VYAMA VYA USHIRIKA B'MULO VYAKOSA WAHASIBU WENYE TAALUMA

VYAMA vya ushirika vya kuweka na kukopa katika Halmashauri ya wilaya ya Biharamulo mkoani Kagera vyadaiwa kushindwa kujiendesha inavyotakiwa kutokana na kukosa wahasibu waliosomea taaluma hiyo.

Ofisa ushirika wa Halmashauri ya wilaya ya Biharamaulo,Mary Kahesi alisema hali hiyo imesababisha vyama hivyo kushindwa kurejesha mikopo ya wanachama na hivyo kukabiliwa na uhaba wa fedha za kuendesha mafunzo kwa wanachama wake.

Kahesi,amesema hayo baada ya kutakiwa na kaimu mkurugenzi wa halmashauri hiyo Bw.Zabron Njanga kutoa maelezo kuhusiana na kuwepo kwa baadhi ya vyama vya ushirika vya vijana kushindwa kurejesha mikopo yake kwa wakati na kupoteza mwelekeo wa mpango  wa kuanzishwa kwake.

Hatua hiyo ya mkurugenzi ilikuja kufuatia baadhi ya madiwani kwenye kikao chao cha baraza kilichofanyika jana(J'tano)kutaka kupewa mpango mkakati wa kuboresha vyama hivyo hasa kwa upande wa makundi ya vijana na akina mama.

Diwani wa kata ya Bisibo Bw.Joseph Kayamba(chadema),alisema pamoja na kuwepo kwa vijana wengi kujiunga kwenye vyama vya ushirika baadhi yao wanakosa mikopo na hivyo vyama hivyo kusambaratika kutokana na kutokuwa na elimu ya ujasiriamali.

Katika taarifa ya utendaji wa kazi na uwajibikaji wa halmashauri hiyo katika kipindi cha kaunzia julai 2012 hadi juni 2013 iliyowasilishwa na ofisa uchumi,Abdalah Mvungi kwenye kikao hicho kuonyesha uhaba wa fedha na wananchi kukosa ubunifu wa kuunganisha shughuli zao ili kuunda vyama vya ushirika.