Polisi, TRA watuhumiana kuwalinda wauza viroba

Jeshi la Polisi Tanzania

 

Kamanda wa Polisi Mkoa wa Kagera, George Mayunga amesema watumishi wa Mamlaka ya Mapato (TRA) mkoani hapa wanashirikiana na wafanyabiashara wa pombe kali aina ya viroba wanaokwepa kodi.
Kauli ya Kamanda Mayunga imekuja siku chache baada ya Kaimu Meneja wa TRA Kagera kuwatuhumu polisi kuwalinda wafanyabiashara hao wanaotokea Uganda kupitia njia ya maji katika Ziwa Victoria.
Akizungumza mjini hapa jana, Kamanda Mayunga alisema wafanyabiashara hao wanapita kwenye geti la Mtukula ambapo watumishi wa mamlaka hiyo wapo kwa ajili ya kukagua na kutoza kodi mizigo inayoingizwa nchini.
Kamanda huyo alikiri kuwapo kwa askari wasio waaminifu ambao wanalichafua jeshi la polisi, hivyo aliahidi kupambana nao huku akisisitiza kwamba siyo kweli kuwa jeshi hilo linakwamisha utendaji wa TRA kama ilivyotuhumiwa awali.
“Suala la pombe kali aina ya viroba nimefanya uchunguzi nimegundua vinaingia kupitia Mtukula eneo ambalo TRA wapo ‘responsible’ (wanawajibika) kukusanya kodi baada ya hapo kuna beria ya polisi na Tanroads Misenyi” alisema na kuongeza:
“Cha kushangaza TRA wanawakimbiza wafanyabiashara waliovusha viroba huku Karagwe… hapo lazima kutilia shaka kwamba wanapitishaje mizigo yao kama hawashirikiani na maofisa wa mamlaka hiyo?” alihoji Kamanda Mayunga.
Kamanda huyo alisema wafanyabiashara wanaoingiza viroba kwa wingi hawapiti njia za panya, badala yake ina aminika kwamba wanavusha kwa njia halali kwa kuwahonga maofisa wanaokua kwenye vizuizi.
“Hii ni vita nyepesi tukishirikiana vizuri na TRA ninaahidi tutalimaliza tatizo hili tutawakamata wanaokwepa kodi, wanaotoa na kupokea rushwa.”
 “Tabu tunayoiona hapa hatujashirikishwa ipasavyo, ninaahidi kuwapa msaada maofisa wa mamlaka hiyo wakati na mahali popote nasisitiza kwamba hatujashindwa iwapo tutashirikishwa kwenye operesheni za kuwakamata wafanyabiashara hao,” aliongeza kusema Kamanda Mayunga.
 

CHANZO: NIPASHE

Minara ya simu sababu ya raia kunyanyaswa Kagera

Hati ya uamuzi iliyosainiwa na Mwenyekiti wa Baraza hilo, R. Leonard inaelekeza kwamba katika makubaliano hayo, Mzee Tibahulila atachukua asilimia 75 ya mapato yatakayotokana na mnara huo, wakati Serikali ya Kijiji cha Musheshe itachukua asilimia 25

Kyerwa. Mapato yanayotokana na ujenzi wa minara ya simu, yanadaiwa kuwa ndiyo chanzo cha kunyanyaswa kwa wakazi 41 wa Kijiji cha Murongo, wilayani Kyerwa katika Mkoa wa Kagera.

Usiku wa kuamkia Januari 22 mwaka huu, wananchi hao wengi wakiwa ni wa familia moja, walikamatwa na Maofisa wa Idara ya Uhamiaji ambao wanadaiwa kwamba waliwatesa kwa kuwapiga na kuwafungia kwa siku nne katika daraja linaloziunganisha Tanzania na Uganda kwa madai kwamba si raia wa Tanzania.

Miongoni mwa waliofanyiwa vitendo hivyo ni Mzee Elika Tibahulila (88), mke wake, Mole Tibahulila (58), watoto watatu wanaosoma shule ya msingi na watoto wadogo na wachanga saba, wakiwamo watatu ambao bado wananyonya.

Tibahulila alipigwa kiasi cha kupata jeraha kubwa chini ya goti la mguu wake wa kulia, na alitibiwa katika Hospitali ya Nyakahanga, Karagwe kisha akaruhusiwa.

Mzee huyo aliliambia gazeti hili: “Kwa kweli bado nina maumivu makali, natembea kwa tabu, nasaidiwa na fimbo (mkongojo)”.

Juzi Msemaji Mkuu wa Idara ya Uhamiaji, Naibu Kamishna, Abbas Irovya alisema ofisi yake ilikuwa bado inafuatilia kwa karibu kuhusu taarifa za kupigwa kwa watu hao na kuahidi kutoa taarifa rasmi baada ya kufahamu ukweli wa suala hilo.

Chimbuko la mgogoro

Wakati watu hao 41wakidaiwa kuwa siyo Watanzania bali raia wa Uganda, gazeti hili limedokezwa kuwa chanzo ni mgogoro kuhusu ujenzi wa mnara wa simu wa Kampuni ya Vodacom ambao ulijengwa katika eneo la Mzee Tibahulila.

Mkazi wa Kitongoji cha Rwamatete, Kijiji cha Murongo, Antony Kakende alisema anamfahamu Mzee Tibahulila tangu 1959, ijapokuwa hakumbuki alikotokea. “Ni mzee wa siku nyingi,tumekuwa naye kwa miaka mingi...watoto wake ni watu wazima sasa,”alisema Kakende.

Mwingine ni Raymond Rwezaula ambaye alisema: “Tunafahamu kwamba huyu mzee wanamsumbua kwa sababu ya mali, maana viongozi wa kijiji walitaka kumnyang’anya ardhi ambako umejengwa mnara wa simu lakini akawashinda mahakamani.”

Naye Maria-Clavera Mansisi ambaye amewahi kuwa Mjumbe wa Halmashauri ya Kijiji cha Murongo, alisema: “Tatizo ni mnara wa simu, maana sisi tumekuwa naye (Tibahulila) kwa miaka yote, hatujawahi kusikia kwamba siyo raia.”

Imebainika kuwa tangu 2009 mzee huyo amekuwa kwenye mvutano na Serikali ya Kijiji cha Murongo baada ya viongozi wake kusaini mkataba na Kampuni ya Vodacom ili kujenga mnara katika eneo ambalo alikuwa analimiliki.

Lakini wakati huohuo, vijiji vya Masheshe na Murongo viliingia katika mzozo vikiwania eneo la Mzee Tibahulila, ambalo Vodacom wamejenga mnara wa mawasiliano. Uongozi wa Murongo ulisaini mkataba na kampuni hiyo ya simu, jambo ambalo Uongozi wa Musheshe ulilipinga.

Mvutano huo ulizaa makubaliano baina ya pande hizo mbili yaliyofanyika chini ya usimamizi wa Uongozi wa Kata ya Murongo, Aprili 2, 2009 na kuandikishiana kwamba eneo ulipo mnara huo ni la Kijiji cha Musheshe, hivyo kubatilisha mkataba wa awali.

Kwa upande wake Mzee Tibahulila alipeleka suala hilo katika Baraza la Ardhi na Nyumba la Wilaya ya Bukoba, ambako hukumu ilitolewa Mei 5, 2010 kwamba pande husika zimalize nje ya mahakama.

Hati ya uamuzi iliyosainiwa na Mwenyekiti wa Baraza hilo, R. Leonard inaelekeza kwamba katika makubaliano hayo, Mzee Tibahulila atachukua asilimia 75 ya mapato yatakayotokana na mnara huo, wakati Serikali ya Kijiji cha Musheshe itachukua asilimia 25.

Hati hiyo ya Baraza la Ardhi na Nyumba pia imesainiwa na Mwenyekiti wa Kijiji cha Musheshe, Thobias Justinian na Mzee Tibahulila ambaye baada ya kumaliza mgogoro huo, aliingia makubaliano mapya na Vodacom, Juni 2012 kwa malipo ya Sh450,000 kwa mwezi.

Mkataba huo ambao gazeti hili limeona nakala yake, ni wa miaka kumi (Juni 1, 2012 – Mei 31, 2022) na unaweza kufanyiwa mapitio baada ya miaka mitano.

Baada ya mgogoro huo kumalizika, Serikali ya Kijiji cha Murongo ilisaini mkataba na Kampuni ya Airtel kwa ajili ya kujenga mnara katika eneo hilohilo, hali ambayo ilisababisha Mzee Tibahulila kufungulia kesi nyingine katika Baraza husika.

Hadi Mzee Tibahulila alipokumbwa na msukosuko wa kutaka kufukuzwa kwenda Uganda kwa madai kwamba siyo raia, shauri hilo bado lipo mahakamani na limepangwa kusikilizwa Februari 14 mwaka huu.

Mwenyekiti wa Kijiji cha Murongo, Martin Mwasi alisema kufukuzwa kwa wananchi hao hakuna uhusiano wowote na mgogoro wa eneo ulikojengwa mnara.

“Sisi tulipewa maelekezo na uongozi wa juu kwamba tuwataje watu wote ambao siyo raia wa Tanzania hata kama walikuja kabla ya uhuru, na sisi tulipeleka majina maana tuna uhakika kwamba hao siyo raia,” alisema Mwasi na kuongeza:

“Kwa hiyo si kweli kwamba eti tumeasingizia kwa sababu ya mapato ya mnara wa simu, Uhamiaji ndiyo wenye sheria ya kuwaondoa.”
Chanzo;Mwananchi

PSPF YAZINDUA MPANGO MPYA WA UUZAJI NYUMBA KWA BEI NAFUU, SOMA HAPA KUJUA BEI ZAKE

Mfuko wa Pensheni wa PSPF unapenda kuutaarifu Umma kuwa umezindua Mpango Mpya wa uuzaji nyumba zake zilizojengwa kwa ajili ya makazi katika mikoa ya Dar es Salaam- Ilala (Buyuni), Morogoro (Lukobe), Tabora (Usule), Mtwara (Mang’amba), Shinyanga (Ibadakuli) na Iringa (Mawelewele).

Bei za nyumba ni kati ya sh. 52,000,000.00 hadi sh. 71,000,000.00 (bila VAT). Bei hizi ni kulingana na ukubwa wa nyumba na mkoa nyumba ilipo.   Ukubwa wa nyumba ni kuanzia vyumba viwili hadi vinne.

Chini ya utaratibu huu mpya unaoanza kutumika kuanzia Februari 2014; Muombaji atapaswa kuainisha kwenye fomu ya maombi aina ya nyumba anayohitaji na Mkoa ilipo.  Malipo yanaweza kufanyika kwa njia zifuatazo:

1)                           UNUNUZI KAMA MPANGAJI (HIRE PURCHASE):

Mnunuzi atalipia kwa mpango wa mwezi mmoja mmoja au miezi mitatu kwa mkupuo (installments) kulingana na thamani ya nyumba. Katika mpango huu, mnunuzi anaweza kulipia kutokana na vyanzo vingine vya mapato yake mbali na mshahara wake. Mwanachama wa PSPF aliyechangia chini ya  miaka mitano (5) atatakiwa kulipia kiasi cha sh. 5,000,000.00 kama malipo ya mwanzo ya nyumba na asiye mwanachama wa PSPF atatakiwa kulipia kiasi cha sh. 10,000,000.00 kama malipo ya mwanzo ya nyumba kukidhi vigezo vya kununua nyumba (kama mpangaji).

Mpango huu wa Ununuzi kama Mpangaji (Hire Purchase) utamwezesha mnunuzi kulipa kati ya sh. 450, 000.00 (laki nne na hamsini tu) na

sh. 813,000.00 (laki nane na kumi na tatu tu) kwa mwezi kama malipo ya nyumba zinazouzwa na Mfuko kulingana na ukubwa na eneo nyumba ilipo.

2)                           MALIPO YA MARA MOJA (OUTRIGHT PURCHASE)

Mnunuzi atalipia gharama ya kununua nyumba kupitia akaunti ya Mfuko na kisha kusaini makubaliano kabla ya kuhamishiwa umiliki (transfer).

3)                           MKOPO WA NYUMBA KUPITIA BENKI (MORTGAGE BASIS):

Mnunuzi anaweza kuchukua mkopo katika mojawapo ya Benki ambazo Mfuko wa PSPF ina mikataba nazo na kutumia mkopo huo kununulia nyumba. Mabenki hayo ni; CRDB, Azania, Exim na NMB. 

MUHIMU! Iwapo utanunua nyumba kupitia mkopo wa benki (Mortgage) utapaswa kuwa umesajiliwa kwenye Mfuko na kuchangia kwa muda wa miaka mitano au zaidi. Muda wa kurejesha mkopo ni mpaka miaka ishirini na mitano (25) kulingana na matakwa ya Benki husika.

Mwombaji anayehitaji kuona au kukagua nyumba awasiliane nasi kupitia simu: +255 22 2120912/52 au +25522 2127375-6 au E-mail: pspf@pspf-tz.org.

Kwa maelezo zaidi fika Makao Makuu ya PSPF yaliyopo jengo la Golden Jubilee Towers, Barabara ya Ohio au ofisi zetu zilizopo katika kila mkoa.

Imetolewa na

Mkurugenzi Mkuu,

Mfuko wa Pensheni wa PSPF 

Mbowe apongeza kung’olewa Amani

MWENYEKITI  wa Chama cha Demokrasia na Maendeleo (CHADEMA), Freeman Mbowe,  amewapongeza madiwani wa Chama Cha Mapinduzi ( CCM ), CHADEMA na Mbunge wa Bukoba Mjini, Khamisi Kagasheki kwa kusimama  kidete kutetea masilahi ya wananchi wa Bukoba kuhusu  tuhuma za  ufisadi dhidi ya Meya wa Manispaa ya Bukoba, Dk. Anatory  Amani.

Mbowe alisema  hayo wakati akihutubia maelfu ya wakazi wa Bukoba waliojitokeza  katika mkutano wa hadhara uliofanyika kwenye Uwanja wa kumbukumbu  wa Mayunga (UHURU PLATFOM ), hali iliyosababisha vijana wa ulinzi wa chama hicho kuwazuia wananchi kuendelea kuingia ndani ya uwanja huo kutokana na idadi kubwa ya watu.

Alisema taarifa ya Mdhibiti na  Mkaguzi Mkuu  wa Hesabu za Serikali (CAG), ilibaini kuwa ubadhirifu uliosimamiwa na meya  ni zaidi ya sh bilioni mbili, ambazo ni fedha za wananchi zinazotokana na kodi.

Alisema mtu yeyote akifanya jambo jema lazima apongezwe bila kujali anatoka chama gani hata kama si wa chama chako.

Hata hivyo alifafanua kuwa CCM ina mng’ang’ania Meya Amani wakati kuna uchafu mwingi  unaofanywa  na viongozi  wa juu,  ukiwemo wizi  wa sh bilioni mbili, fedha zilizofujwa na Amani  ni fedha chache ukilinganisha na zinazoibwa na viongozi wa ngazi  ya juu na hawachukuliwi hatua yoyote.

Alisema sakata la Bukoba limewagawa watu katika misingi ya udini kwa waumini wa dini  anayoabudu meya huyo na kumtetea wakati amefanya ubadhirifu wa fedha za umma, kitu ambacho si sawa  na hata dini hazisemi hivyo.

Kwa upande wake, Mbunge wa Jimbo la Ubungo, John Mnyika, alisema viongozi wa serikali wanafanya ufisadi mkubwa  lakini hawachukuliwi hatua na matokeo yake wananchi wanaumizwa kwa kupandishiwa  gharama za maisha.

Mnyika alisema  mawaziri waliojiuzulu kwa kashfa za kifisadi  kwa kusaini mikataba mibovu ikiwamo ya Richmond wanaendelea kutamba  kwa fedha za wananchi wa Tanzania.

Aidha, alisema kujiuzulu kwa Kagasheki katika nafasi ya uwaziri haitoshi, kwani anapaswa kujiuzulu na ubunge kwa kushindwa kusimamia wizara yake na wananchi waliomtuma  kuwawakilisha  bungeni kwa  kupeleka kero zao ili zitatuliwe.

Chanzo;Mwananchi

CHADEMA kususia Uchaguzi Mkuu 2015

CHAMA cha Demokrasia na Maendeleo (CHADEMA) kimetoa sharti ambalo kama halitatekelezwa chama hicho hakitashiriki Uchaguzi Mkuu wala hakitapiga kura ya kupitisha rasimu ya katiba.

Sharti hilo lilitolewa mjini Bukoba juzi na Mwenyekiti wa CHADEMA, Freeman Mbowe, wakati akihutubia katika mkutano wa hadhara ikiwa ni mwendelezo mikutano ya Operesheni ya M4C Pamoja Daima uliofanyika katika Uwanja wa Mashujaa na kuhudhuriwa na umati mkubwa wa watu.
Alisema chama hicho hakitashiriki uchaguzi iwapo Serikali haitaboresha Daftari la Kudumu la Wapigakura wakati huu wa kuelekea uchaguzi mkuu na upigaji kura wa rasimu ya katiba.
Mbowe alisema kwa jins hali inavyoonesha Serikali haioneshi nia ya kuboresha Daftari la Kudumu la Wapiga Kura wakati tunaelekea katika uchaguzi Mkuu mwakani.
Alisema katika utafiti wao wamebaini kuwepo kwa vijana zaidi ya milioni 5.3 ambao wamefikisha umri wa miaka 18 wanaotakiwa kushiriki kupiga kura mwakani kuchagua viongozi wao.
Alisema katika hilo nchi itasimama kwa vile kama tunahitaji mabadiliko hayawezi kufanyika bila kuboresha daftari la kura. Kuhusu Rasimu ya Katiba, Mbowe aliapa mbele ya mkutano huo kuwa mwaka huu ndio atang’olewa meno bungeni, kwani hawatakuwa tayari kuburuzwa wakati wa Bunge la Katiba lijalo .
Alisema:“Suala la katiba halina masihara ni maisha yenu, maisha ya watoto wenu, maisha ya vizazi na vizazi, ni maisha ya taifa letu kila Mtanzania mwenye umri wa miaka 18 wa kupiga kura lazima apige kura kukubali rasimu ya katiba mpya, nasi Bungeni hatutakubali kuburuzwa. ”
Alisema kutokana na hali hiyo, wananchi wanapaswa kujitokeza kwa wingi kujadili rasimu ya katiba mpya. Alisema bunge lijalo la katiba wao wanaenda kujadili rasimu ya Katiba Mpya ambayo tayari wameshaona .
“Tayari CCM wanampinga Mwenyekiti wa Tume ya Mabadiliko ya Katiba, Jaji Joseph Warioba kuhusiana na maoni ya wananchi kutaka serikali tatu, wakati wao haimo kwenye sera yao, hapa kuna tatizo, kwani sisi tunaenda kujadili maoni yawananchi wengi si kutetea sera za vyama vya siasa,” alisema.
Alisema katiba si suala la kidini, sera za vyama vya siasa wala la kikabila , bali ni ya watu wote kwa ajili ya mustakabali wa maisha na taifa kwa ujumla, hivyo hawaendi Dodoma kwa ajili ya kupinga Katiba hiyo, bali kupitisha maoni ya wananchi wanavyotaka.
Pamoja na mambo mengi, Mbowe aliwapongeza madiwani wa Manispaa hiyo bila kujali itikadi za vyama kuungana kupinga ufujaji wa kodi za wananchi maskini wa Manispaa uliokuwa ukifanyika ndani ya Manispaa hiyo.
“Mimi napenda kuwapongeza Madiwani wa Manispaa ya Bukoba pamoja na Mbunge wao, Balozi Kagasheki, ambao kwa pamoja walisimama kutetea maslahi ya wananchi wa Bukoba, ukweli tuuseme na mnyonge mnyongeni na haki yake mpeni,” alisema.
Wakati huo huo, Mjumbe wa Kamati Kuu ya Chama cha Demokrasia na Maendeleo (CHADEMA),Tundu Lissu, amewaonya baadhi ya wanasiasa wanaotumia makanisa na misikiti kuwashawishi wananchi ili wawachague kuwa viongozi katika uchaguzi wa mwaka huu 2014/15.
Lissu aliyasema hayo wakati alipokuwa akizungumza katika mikutano miwili iliyofanyika katika Kijiji cha Ilongero na Mjini Singida juzi wakati akiwa kwenye siku ya kwanza ya ziara ya ujumbe wa chama hicho ikiwa ni mwendelezo wa Operation M4C Pamoja Daima itakayofanyika nchi nzima.
Alisema kuwa pamekuwa na tabia ya baadhi ya wanasiasa Wakristo na Waislamu ambao hupita makanisani na misikitini na kutoa fedha kwalengo la kujijengea umaarufu jambo ambalo aliwataka wananchi wawe macho nao.
Alisema pamoja na wanasiasa hao kujiwekea mazingira ya kushawishi wananchi ili wawachague, Watanzania hawawakubali kwani hiyo inaweza kuleta tofauti za kidini.
“ Lazima tukumbuke mafundisho ya Baba wa Taifa, hayati Mwalimu Julius Nyerere ambayo yalisisitiza kuzingatia amani, upendo na mshikamano kwa kuepuka kugawanywa na watu hao,” alisema.
Kuhusu Katiba Rasimu ya Pili ya Katiba, alisema ni nzuri na kuzingatia vipengele vingi vilivyotolewa maoni kurekebishwa kazi ambayo ilifanywa na CHADEMA pamoja na wananchi wengine.
Alisema suala kubwa ni kuona kuwa Rasimu hiyo haichakachuliwi kwa manufaa ya chama cha siasa au viongozi kwa ajili ya maslahi yao.
“Tunasisitiza kuwepo kwa uboreshaji wa Daftari la Kudumu la Wapiga kura kuboreshwa ili wananchi wengi wakiwemo vijana waliofikia umri huo na wale waliopoteza shahada zao waweze kushiriki katika zoezi laku pigakura za maoni,”alisema.
Katika hatua zingine , Mwenyekiti wa Baraza la Vijana wa CHADEMA Taifa, John Henje, alisema chama hakitavumilia mtu yeyote anayetaka kukizamisha chama hicho. “Mtu yeyote akileta
 mchezo atafukuzwa, CHADEMA itaendelea kwani hakuna aliye mkubwa au maarufu kuliko wanachama,” alisema. Alieleza kuwa chama hicho kitaendelea kuwepo na kinachotakiwa sasa ni kuzungumzia mambo ya msingi yanayokijenga na kukiendeleza.

Chanzo;Majira

Halmashauri yalalamikiwa

Karagwe. Baadhi ya abiria Mji Mdogo wa Kayanga na wamiliki wa daladala, wamelalamikia uongozi wa Halmashauri ya Karagwe kushindwa kutengeneza miundombinu ya stendi ya wilaya miaka 50 iliyopita tangu wilaya kuanzishwa.

Wakizungumza kwa nyakati tofauti, baadhi ya abiria walionyesha kukerwa na magari kujipanga kandokando barabara kutokana na ubovu wa stendi.

Selian Katabazi alisema utaratibu unaotumiwa wa kuegesha magari kandokando ya barabara, ni hatari kwa maisha ya watu.

Katabazi alisema inashangaza kuona makao makuu ya wilaya ambayo imeanza miaka 50 iliyopita, ikiwa imeongozwa na wakuu wa wilaya 21 na wakurugenzi 14 haina miundombinu ya kuridhisha.

Nao wamiliki wa daladala, walisikitishwa na halmashauri kuendelea kukusanya ushuru katika stendi ambayo haikidhi vigezo. Mkurugenzi wa Halmashauri ya Wilaya ya Karagwe, Bosco Ndunguru akijibu swali la Diwani wa Kata ya Kayanga, Adventina Kahatano (CUF) alipotaka kujua hatua ya makao makuu ya wilaya kutokuwa na stendi, alisema itapangiwa bajeti mwaka ujao wa fedha na kukukiri kuwa haikuwekwa kwenye vipaumbele vya bajeti mwaka huu.
Chanzo;Mwananchi

Mbowe: Niko tayari kwenda jela kwa kudai katiba mpya

Mwenyekiti wa CHADEMA, Freeman Mbowe

 

Chama cha Demokrasia na Maendeleo (Chadema) kimeendelea na ziara zake za Operesheni Movement For Change (M4C) na ‘Pamoja Daima katika maeneo kadhaa nchini huku viongozi wake wakuu wakizungumzia mambo makuu yanayoikabili nchi.
Mwenyekiti wake, Freeman Mbowe, akiwa mkoani Kagera, alisema yuko tayari kuwa wa kwanza kufungwa kwa kosa la kudai katiba mpya itumike ikiwa serikali italazimisha kuendelea kutumia katiba ya zamani.
Mbowe alisema hayo jana wakati akihutubia maelfu ya wakazi wa wilaya ya Ngara.
Alisema wananchi wengi wamependekeza kuwapo kwa Muungano wa wa serikali tatu katika rasimu ya katiba mpya, lakini zipo njama zinayofanywa kuchakachua maamuzi ya wananchi kuhusu mfumo huo wa Muungano.
Alisema kama maamuzi hayo ya wananchi walio wengi yatachakachuliwa, yuko tayari kuzunguka nchi nzima kuwahamasisha wananchi waikatae katiba hiyo.
Aliongeza kuwa ikiwa wananchi wataikataa katiba hiyo, pia hawatakuwa tayari kuendelea kutumia katiba ya zamani inayotumika hivi sasa kama serikali ilivyokwishasema.
“Nitakuwa wa kwanza kufungwa endapo katiba inayoandaliwa sasa itachakachuliwa na baadhi ya watu ambao hawataki shirikisho la serikali tatu kwa kuwa nitazunguka nchi nzima kuhamasisha wananchi kuikataa na baada ya kuikataa, pia hatutakuwa tayari kurudia ile ya zamani,” alisema Mbowe na Kuongeza:
“Haiwezekani Watanzania walio wengi wakatoa maoni kuhusu katiba wanayoitaka wao halafu wengine wakaichakachua eti tu kwa sababu ya maslahi yao binafsi ya kutaka kujitengenezea mazingira ya ulaji. Katiba ni uhai wa Watanzania siyo ya chama chochote cha siasa au ya mtu fulani, mbona Zanzibar wenyewe wametengeneza katiba yao kwa nini na sisi tusingeneze Tanganyika.”
Aliongeza kuwa haiwezekani kutumia muda mwingi na gharama kubwa ya fedha kuandaa katiba hiyo, halafu watu wengine wakaichakachua, na kwamba hata kama rasimu ya katiba mpya itakataliwa haiwezekani kuendelea
ya sasa na kwamba itailazimisha serikali kuangalia utaratibu mwingine wa kuhakikisha Katiba mpya inapatikana.
“Wazo la kurudi katika katiba ya zamani haipo kabisa, kama serikali ya CCM inajidanganya kwamba watachakachua katiba inayoandaliwa sasa halafu tukarudi kutumia ile ya zamani hiyo haipo na itawagharimu,” alisisitiza.
Kadhalika, Mbowe alisema atazunguka nchi nzima kuwahamasisha watanzania kususia zoezi la upigaji kura ya maoni ya katiba endapo Tume ya Taifa ya Uchaguzi (NEC) itashindwa kuboresha daftari la kudumu la wapigakura.
Alisema kupiga kura ni haki ya msingi ya Watanzania, na kwamba mpaka sasa zaidi ya Watanzania 5,300,000 hawana uwezo wa kupiga kura kwa sababu hawana shahada ya kupigia kura.
Akizungumza mjini Bukoba jana jioni, Mbowe alisema hivi sasa ni wakati wa Chadema kuwang’oa madiwani wa CCM waliohusika katika ufisadi uliobainishwa na ripoti ya Mdhibiti na Mkaguzi Mkuu wa Hesabu za Serikali (CAG).
MNYIKA: MJADALA WA GESI BADO
Mkurugenzi wa Habari na Uenezi, John Mnyika, amemtaka Rais Jakaya Kikwete na Waziri wa Nishati na Madini, Prof. Sospeter Muhongo, kutofunga mjadala wa gesi ili kujadiliwa na wananchi kwanza.
Alisema hayo wakati akihutubia maelfu ya wakazi wa Kigoma mjini baada ya wakazi hao kutofahamu kama mkoa wao una gesi wakati Serikali ilishatangaza kunadi leseni za vitalu.
“Wakati Sera, Katiba na Sheria imeweka msingi wa kuhakikisha rasilimali za Taifa zinalindwa na wananchi hususani wazawa wana nufaika, wananchi hawafahamu kama wana gesi. Hivyo kama Rais na Waziri Muhongo hawatasitisha, nitachukua hatua za kisheria kuhakikisha mjadala huu unarudishwa kwa wananchi,” alisema Mnyika.
Aidha Chama hicho kimetangaza kuwa hakitakubali uchaguzi wa vijiji na mitaa 2014 na uchaguzi mkuu 2015 ufanyike huku kukiwa na mfumo wa usiyo kuwa huru wa uchaguzi.
Mnyika alisema wanapinga rasimu kutoa mwanya kwa wakurugenzi, watendaji na wateule wa Serikali ambao pia wanahusika na kashfa mbalimbali kusimamia uchaguzi badala ya watumishi huru wa Tume ya Uchaguzi, kwani ni vigumu kusimamia uchaguzi huru na wa haki.
“Pamoja na kushinikisha ushindi wa nguvu ya umma kuna haja ya kuhakikisha kwenye mchakato wa katiba mpya kuna kuwa na tume huru ya uchaguzi, pamoja na kuunga mkono rasimu ya katiba juu ya muundo wa Muungano wa Shirikisho Serikali tatu, lakini ukweli ni kwamba bado haijaweka mfumo huru wa uchaguzi,” alisema Mnyika.
Akizungumza mjini Bukoba jana jioni, aliwataka Watanzania washikamane kupinga ongezeko la gharama za umeme ambazo ongezeko lake limechangiwa na baadhi ya viongozi wa serikali kusaini mikataba mibofu na kuitaja ya IPTL, Richmond na Songas.
LEMA ALIA NA ZITTO
Mbunge wa Arusha Mjini, Godbless Lema, alisema kuwa juzi walipata mapokezi makubwa mjini Kigoma na kwamba kila mtu akiwa katika chama afanye kazi ya kukijenga badala ya kukibomoa.
Alisema licha ya kuwapo na madai kuwa aliyekuwa Naibu Katibu Mkuu, Zitto Kabwe, ana umaarufu mkubwa mkoani humo, jambo hilo halina ukweli.
Alidai mwaka 2010 walitegemea kupata ushindi katika Jimbo la Mpanda, lakini Zitto aliandika barua akieleza kuwa Waziri Mkuu, Mizengo Pinda, awe mgombea pekee.
Alisema baada ya chama kupata taaarifa na kutaka kumwajibisha Zitto, Mwenyekiti Mbowe, aliingilia kati na kusitisha uamuzi huo.
Alisema kutokana na waraka walioukamata aliodai uliokuwa na malengo ya kukisambaratisha chama, waliona hawana sababu za kuendelea na Zitto na kumvua nyadhifa zake na kwamba kitendo cha kuweka pingamizi mahakamani asijadiliwe kinamfanya awe mbunge wa Mahakama.
Alisema mwaka 2000 walikuwapo madiwani 11 katika jimbo la Zitto la Kigoma Kaskazini, lakini mwaka 2005 alipogombea walipungua na kubakia sita na kwamba mwaka 2010 walipungua zaidi na kubakia wawili, hivyo hakuna ukweli kuwa amekijenga chama katika jimbo lake.
Umati mkubwa wa wakazi wa Manispaa ya Bukoba jana walimiminika kwa wingi katika uwanja wa Uhuru kuwasikiliza Viongozi wa Chadema waliohutubia mkutano wa hadhara.
Kabla ya mkutano huo, yalifanyika maandamano makubwa yaliyokuwa yakiongozwa na vijana waendesha pikipiki.
LISSU ASISITIZA UADILIFU
Akihutubia mkutano wa hadhara jana jioni katika viwanja vya Shule ya Msingi Ukombozi mjini Singida, Lissu aliwataka Watanzania wasikubali kuchonganishwa kwa kutumia misingi ya udini kutoka kwa baadhi ya viongozi wa CCM wenye uchu wa madaraka.
Alisema wananchi waangalie kiongozi ambaye ni mwadilifu na anayeichukia rushwa na kwamba wamchague kiongozi mwadilifu ambaye atatoka Chadema.
Alisema hakuna mtu mashuhuri chadema bali wanachama na kuongeza kuwa Chadema wakichukua nchi hawatakuwa waoga wa kufanya maamuzi magumu na kuwa watafukuza waziri yayote anayekiuka kanuni na taratibu za nchi.

CHANZO: NIPASHE

FREEMAN MBOWE NA MAKAMU WAKE WAUNGURUMA MKOANI KAGERA

 

Mwenyekiti Taifa Freeman Mbowe na Makamu wake, Said Issa Mohamed wakishambulia jukwaa Ngara mkoani Kagera.

 Mo Blog

MBEYA CITY YAWACHABANGA KAGERA SUGAR GOLI MOJA BILA

TIMU ya Azam FC na Mbeya City zimeendelea kuifukuzia Yanga kileleni mwa msimamo wa Ligi Kuu Tanzania Bara, baada ya zote kuibuka na ushindi wa bao 1-0.

Azam iliifunga Mtibwa Sugar uwanja wa Chamazi nje kidogo ya Jiji la Dar es Salaam, huku Mbeya City ikiichapa Kagare Sugar mjini Bukoba.

Ushindi huo umezifanya Azam na Mbeya City zote kufikisha pointi 30, moja nyuma ya Yanga yenye pointi 31 baada ya kushuka dimbani mara 14.

Katika mchezo wa Azam na Mtibwa, timu zote zilianza kwa kushambuliana kwa zamu, huku Azam ikionekana kulisakama lango la Mtibwa kwa kasi zaidi, lakini uimara wa mabeki wake waliweza kukoa hatari kadhaa.

Pasi iliyopigwa na Joseph Kimwaga iliweza kumpata vizuri, Tchetche aliyefunga bao hilo pekee baada ya kuweza kuwachomoka mabeki wa Mtibwa na kufumua shuti lililojaa moja kwa moja wavuni.

Kikosi cha Azam kilikuwa; Mwadini Ali, Malika Ndeule, Erasto Nyoni, Said Mourad, Aggrey Morris, Kipre Balou, Himid Mao, Salum Abubakar ‘Sure Boy’, Brian Umony/Ismael Kone dk13/Khamis Mcha dk71, Kipre Tchetche na Joseph Kimwaga/Seif Karihe dk69.

Mtibwa Sugar; Hussein Sharrif, Hassan Ramadhani, Said Mkopi, Salim Mbonde, Salvatory Ntebe, Shaaban Nditi, Shaaban Kisiga, Masoud Ally/Abdallah Juma dk62, Juma Luizio/Mussa Mgosi dk84, Jamal Mnyate na Vincent Barnabas/Mohamed Salum dk75.

Katika mchezo mwingine, Coastal Union ilitoka sare ya kufungana bao 1-1, JKT Oljoro mchezo uliopigwa uwanja wa Mkwakwani jijini Tanga

MADIWANI BUKOBA WAMKAMIA AMANI

MADIWANI wa Manispaa ya Bukoba, wamemtaka Mkurugenzi Mtendaji wa manispaa hiyo, kuitisha kikao ndani ya siku saba ili wampigie kura ya kutokuwa na imani na aliyekuwa meya, Dk. Anatory Amani.

Hatua hiyo inakuja zikiwa ni siku chache tangu Dk. Amani kukanusha kauli yake, akidai hajajiuzulu baada ya taarifa ya Mdhibiti na Mkaguzi Mkuu wa Hesabu za Serikali (CAG) kumtia hatiani kuhusu miradi ya maendeleo katika manispaa hiyo.

Kufuatia kauli hizo tatanishi za Amani, madiwani wametaka kiitishwe kikao cha baraza ili wamng’oe wao wakisema kuwa ndio wenye mamlaka ya mwisho ya kufanya hivyo kwa sababu ndio waliomuweka madarakani.

Madiwani hao walitoa msimamo huo juzi kwenye mkutano wa hadhara mjini hapa uliohutubiwa na Mbunge wa Bukoba Mjini, Balozi Khamis Kagasheki pamoja na Diwani wa Kata ya Bakoba, Felician Bigambo (CUF).

Akizungumza katika mkutano huo, Bigambo alisema kuwa Januari 22 mwaka huu, kupitia vyombo vya habari walimwona Dk. Amani akikanusha kwamba hakuwahi kujiuzulu.

Alisema kuwa kwa sababu Amani anadai kuwa Naibu Waziri wa Tamisemi, Aggrey Mwanri aliyesoma taarifa ya Waziri Mkuu ya kumshauri ajiuzulu hana mamlaka ya kumwondoa, basi watamng’oa wao.

“Sisi ndio wenye kauli ya mwisho katika sakata hili la kumuondoa Amani, kwa hiyo tunamtaka mkurugenzi Shemwela Ambakise aiitishe kikao cha baraza ili tumpigie kura ya kutokuwa na imani na Amani,” alisema.

Balozi Kagasheki alitumia fursa hiyo kutoa ufafanuzi wa kujiuzulu kwake katika nafasi ya Waziri wa Maliasili na Utalii akisema hatua hiyo ilitokana na matatizo yaliyotokea katika Operesheni Tokomeza Ujangili ambapo watu walijeruhiwa na wengine 10 kuuawa.

“Katika tukio kama hilo hakuna mtu ambaye angeweza kufurahishwa nalo. Hivyo mimi kama kiongozi wa wizara hiyo niliamua kuwajibika kisiasa kwa kujiuzulu,” alisema.

Balozi Kagasheki alisema operesheni hiyo si ya kwanza bali katika miaka ya 1980 ilishafanyika Operesheni Uhai ambapo tembo 30,000 kati ya 60,000 katika pori la Selous waliuawa na majangili.

Aliongeza kuwa baada ya operesheni hiyo, idadi ya tembo ilipanda tena na kufikia 50,000 katika miaka ya 2000, kwamba ujangili huo wa kutisha umejitokeza tena kwa sasa hadi tembo kupungua kutoka 70,000 katika pori hilo na kubaki 13,0000.

Kwa mujibu wa Kagasheki, hali hiyo ndiyo iliilazimu serikali kuanzisha Operesheni Tokomeza Ujangili maalumu kwa nchi nzima ili kunusuru wanyama hao wasitoweke kabisa.

Alitoa mfano wa Rais mstaafu wa Awamu ya Pili, Ali Hassan Mwinyi kuwa naye alijiuzulu wadhifa wa Waziri wa Mambo ya Ndani wakati wafungwa walipokufa kutokana na msongamano gerezani.

“Kujiuzulu ni jambo la kawaida wala haliniumizi nafsi yangu, labda ningeumizwa pale ambapo ningetuhumiwa kwa ufisadi au nimeiba mali za umma,” alisema.

Balozi Kagasheki alisema kuwa kwa sasa anawaomba wananchi wa Bukoba kumuunga mkono katika suala zima la kuleta maendeleo yao kwani sasa atakuwa na muda mrefu wa kuwa nao jimboni.

Pia alisema kuwa kutokana na ubadhirifu wa zaidi ya sh bilioni mbili uliobainika katika ripoti ya CAG, Ludovick Utouh, yeye pamoja na madiwani hawataishia hapo bali wataendelea kuishauri serikali kuwafikisha mahakamani watuhumiwa hao wote akiwemo aliyekuwa meya.

Chanzo:Tanzania Daima

KISWAGA; WANANCHI WACHANGAMKIE KILIMO BADALA YA KUSUBIRI GESI

Festo Kiswaga

 

Madiwani na watendaji wa wilaya ya Nanyumbu mkoani Mtwara wameagizwa kuwahamasisha wananchi wa wilaya hiyo,  kuchangamkia fursa ya kilimo badala ya kutegemea gesi.
Agizo hilo lilitolewa jana na Mkuu wa wilaya hiyo, Festo Kiswaga, wakati akifungua kikao cha baraza la madiwani.
Alisema wilaya hiyo inategemea zaidi kilimo hususan katika mazao ya karanga, mbaazi, ufuta, korosho na kunde, hivyo kuwaagiza madiwani na watendaji wa wilaya hiyo kuhamasisha wananchi kujikita zaidi katika kilimo.
“Sisi huku tunaishi porini, na kama tuko porini ni lazima tufanye mapinduzi ya kilimo ikiwa ni pamoja na kuwahamasisha wananchi kutegemea zaidi kilimo ambacho ni uti wa mgongo,” alisema na kuongeza "Hata siku moja gesi haiwezi kutunufaisha wakazi wa Nanyumbu kwa kuinua kipato, gesi hii tuitegemee zaidi kwa ajili ya kupata umeme ambao utatusaidia kuleta maendeleo mengine,” alisistiza.
Alisisitiza uwekezaji na ushindani wa biashara hasa katika zao la ufuta ambalo alisema kuwa  Wachina wanahitaji tani 200 za zao hilo hivyo kuwataka wananchi kuboresha kilimo chenye tija.
Alitahadharisha kuwa gesi katika isiwe kisingizio kwa baadhi ya wananchi kuacha kilimo badala yake watumie fursa hiyo kuboresha kilimo cha mazao ya chakula ambayo yatauzika kwa wawekezaji wa gesi na kuwaongezea kipato na kuondokana na umasikini.
Katika kikao hicho halmashauri hiyo inakadiria kukusanya Sh. 17,111,839,126.00 kutoka katika vyanzo mbalimbali vya mapato katika mwaka wa fedha 2014/2015.
Akisoma makisio hayo jana katika kikao hicho, Mkurugenzi Mtendaji wa halmashauri hiyo, Eliza Bwana, alisema kuwa kumekuwepo na ongezeko la asilimia 32.2 ikilinganishwa na bajeti ya mwaka 2012/2013 ambayo ni Sh. 12,000,000,000.94
Alisema kuwa ongezeko hilo linatokana na nyongeza za idara na vitego ambapo itahitajika mishahara stahiki kwa watumishi wa  idara  na vitengo hivyo pamoja na gharama za uendeshaji wa ofisi.
 

CHANZO: NIPASHE

KAMPENI TOKOMEZA MNYAUKO KUWAFUNGA WAKULIMA WAKAIDI

Kyerwa. Mkuu wa Mkoa wa Kagera, Kanali Mstaafu Fabian Massawe ametangaza kuanzisha jitihada za kudhibiti ugonjwa wa mnyauko unaoathiri migomba unaoenea kwa kasi Wilaya ya Kyerwa, Mkoa wa Kagera,

Hatua hiyo ilitangazwa na Ofisa Kilimo Ofisi ya Mkuu wa Mkoa juzi, Stella Ndea na kwamba inatarajia kuanza wiki ijayo.

Alikuwa akizungumza na wakulima wa vijiji vya Rutunguru na Kihanga, wilayani Kyerwa.

Ndea alisema tayari sheria ndogondogo zimetungwa kudhibiti watu watakaoshindwa kufuata ushauri unaotolewa na wataalamu wa kilimo, ambao ni kukata migomba ambayo iimeathirika.

Ndea alisema licha ya sheria hizo, ofisi ya mkuu wa mkoa imejiandaa kuendesha Operesheni Tokomeza Mnyauko itakayohusisha wilaya zote za mkoa na itahitimishwa Juni mwaka huu.
Chanzo:Mwananchi

PSPF YATOA PONGEZI KWA WAZIRI NA MANAIBU WAZIRI WA WIZARA YA FEDHA

MFUKO WA PENSHENI WA (PSPF)

                       

SALAMU ZA PONGEZI

Waziri wa Fedha Mhe. Saada Mkuya Salum (MB)

 Naibu Waziri wa Wizara ya Fedha, Mh. Adam K. Malima. 

Naibu Waziri wa Wizara ya Fedha; Mh. Mwigulu L. Nchemba.

Mwenyekiti wa Bodi ya Wadhamini na wafanyakazi wa Mfuko wa Pensheni wa PSPF wanatoa pongezi za dhati kwa Mhe. Saada Mkuya Salum (MB) kwa kuteuliwa kuwa Waziri wa Fedha.

Vile vile, PSPF inatoa pongezi kwa kuteuliwa kwao Naibu Mawaziri wapya wa Wizara ya Fedha; Mh. Mwigulu L. Nchemba (MB) na Mh. Adam K. Malima.

Bodi ya Wadhamini na Wafanyakazi wote wamepokea kwa furaha uteuzi wenu mliopewa na Mheshimiwa Rais wa Jamhuri ya Muungano wa Tanzania Mh. Dkt. Jakaya Mrisho Kikwete. PSPF ipo tayari wakati wote kushirikiana nanyi katika kuleta tija katika utendaji wa Wizara ya Fedha na sekta nzima ya Hifadhi ya Jamii kwa ujumla hapa nchini.

PSPF - Tulizo la Wastaafu

Mkurugenzi Mkuu

Mfuko wa Pensheni - PSPF

Wanafunzi 9,000 Karagwe hawajui kusoma

ZAIDI ya wanafunzi 9,000 wilayani Karagwe hawajui kusoma, kuandika na kuhesabu.

Hali hiyo imebainika kutokana na utafiti uliofanywa na halmashauri ya wilaya hiyo mwaka jana.

Ofisa Elimu Shule za Msingi, Gidion Mwesiga, alibainisha hayo jana alipozungumza na waandishi wa habari ofisini kwake.

Mwesiga alisema utafiti wa kubaini wanafunzi hao ulifanyika Mei katika shule mbalimbali za wilaya hiyo kwa kushirikisha walimu, waratibu wa elimu kata na viongozi wa Idara ya Elimu.

Alisema utafiti huo ulibaini wanafunzi 9,786 wasiojua kusoma, kuandika na kuhesabu ambapo wasichana ni 4,729 na wavulana ni 5,057.

Mwesiga alisema wanafunzi hao ni wa darasa la pili hadi la sita katika shule 108 za serikali na kata 22 zilizopo wilayani hapa.

Alitaja baadhi ya kata ambazo zina idadi kubwa ya wanafunzi wasiojua kusoma na kuandika ni Bweranyange (356), Nyakasimbi (386) na Chanika (453).

Alisema tatizo kubwa la wanafunzi hao kutojua kusoma na kuandika ni kutokana na utoro, baadhi ya wazazi kutokuwa na mwamko wa elimu na watoto wengine kutoanzia madarasa ya awali.

Alitaja baadhi ya mikakati iliyoandaliwa na halmashauri hiyo ili kukabiliana na tatizo hilo kuwa ni kuwakaririsha wanafunzi wote wasiojua kusoma na kuandika, kutengewa madarasa maalumu na muda maalumu baada ya saa za masomo kwa ajili ya kufundishwa.

Chanzo;Tanzania Daima

KAGERA YATANGAZA KUPAMBANA NA UGONJWA WA UNYANJAO

Mkoa wa Kagera umetangaza oparesheni maalum ya kutokomeza ugonjwa wa unyanjano unaoshambulia migomba kwa mwaka 2014, kwa lengo la kuhakikisha ifikapo mwishoni mwa mwaka huu ugonjwa huo uwe umekwisha kabisa.

Katibu tawala wa mkoa wa Kagera Nassor Mnambila amesema kuwa oparesheni hiyo iliyopewa jina la “oparesheni tokomeza unyanjano”, itafanyika katika wilaya zote za mkoa huo, kuanzia ngazi za vitongoji.

Mnambila amesema kuwa kuanzia Januari hadi Juni ni kipindi cha wananchi kung’oa na kuchoma moto migomba iliyoathirika kwa hiari na kuwa baada ya hapo kuanzia mwezi Julai kikosi kazi kitavamia mashamba yote yaliyoathirika na kung’oa migomba hiyo kwa nguvu.

Amesema kuwa wananchi na watendaji watakaobainika kukwamisha zoezi hilo watashtakiwa kwa sheria ndogo zilizotungwa na halmashauri kwa ajili ya kupambana na ugonjwa huo na sheria ya kilimo ya kudhibiti magonjwa.

Amesema wana mpango wa kutoa elimu kwa maafisa ugani ili waujue vizuri ugonjwa huo, ndipo wataweza kushiriki kikamilifu, na kuwa pia wananchi wataendelea kuelimishwa kuhusu njia bora za kupambana na ugonjwa huo kwa kushirikiana na kituo cha utafiti wa kilimo cha Maruku.

Akizungumzia oparesheni hiyo mkuu wa mkoa wa Kagera kanali mstaafu Fabian Massawe amesema kuwa tayari halmashauri zote zimekwishaandaa sheria ndogo kwa ajili ya kudhibiti ugonjwa huo.

Tuhuma za ufisadi: CAG aiokoa CCM Bukoba

  Meya Amani akwepa kura ya kutokuwa na imani, ajiuzulu
  Kama ilivyokuwa kwa Balozi Kagasheki bungeni, Pinda ahusika

Mkaguzi na Mdhibiti Mkuu wa Hesabu za Serikali (CAG), Ludovick Utoah

Mkaguzi na Mdhibiti Mkuu wa Hesabu za Serikali (CAG), Ludovick Utoah, amekiokoa Chama Cha Mapinduzi (CCM) kutoka kwenye mgawanyiko uliodumu miongoni mwa madiwani wake kwa zaidi ya mwaka mmoja.

Taarifa ya CAG kuhusu utata uliodaiwa kuwapo kwenye mikataba iliyosainiwa kuhusu miradi mbalimbali ya maendeleo, imebaini ‘madudu’ yaliyosababisha kujiuzulu kwa Meya wa Manispaa ya Bukoba, Dk Anatory Amani.

Hoja ya kuwapo kwa mikataba yenye utata ikihusishwa na ufisadi, ikidaiwa kukiukwa taratibu na sheria ya manunuzi ya umma, iliwagawa madiwani wa CCM katika manispaa hiyo na kuathiri utendaji wa baraza la madiwani, lenye wawakilishi kupitia vyama vya upinzani.

Pamoja na asili ya mgogoro huo kuwa katika mikataba yenye utata, mpasuko kwa madiwani wa CCM, ulihusishwa na ‘mbio za ubunge’ wa Bukoba Mjini kwa Uchaguzi Mkuu wa mwakani.

Pande mbili za madiwani hao zikagawanyika katika kuwaunga  Dk Amani na Mbunge wa Bukoba Mjini, Balozi Kagasheki.

Wawili hao walishawahi kukutanishwa katika vikao mbalimbali vya CCM kuanzia ngazi ya wilaya hadi Kamati Kuu (CC) ya CCM iliyowahoji mjini Dodoma, Agosti mwaka jana.

Kufuatia kuhitimishwa kwa ukaguzi wa CAG na kugundulika kwa kasoro kadhaa, Waziri Mkuu, Mizengo Pinda, alimshauri Dk Amani kutumia busara ya kujiuzulu wadhifa huo kwa manufaa ya wananchi.  

Akitangaza hatua hiyo jana, Dk Amani ambaye pia ni diwani wa kata Kagondo, alikubaliana na ushauri wa Pinda, kuwa ajiuzulu kwa hiari yake, kabla ya madiwani kupiga kura ya kutokuwa na imani naye.

Kujiuzulu kwa Dk Amani, kumekuja siku 27 baada ya hatua kama hiyo kuchukuliwa na Mbunge wa Bukoba Mjini aliyekuwa pia Waziri wa Maliasili na Utalii, Balozi Khamis Kagasheki.

Wakati Dk Amani aliepuka kura ya kutokuwa na imani kutoka kwa madiwani jana, Balozi Kagasheki, alijiuzulu Desemba 21, mwaka jana, muda mfupi kabla ya tamko la Rais Jakaya Kikwete, kuwawajibisha yeye na wenzake watatu. 

Mawaziri wengine waliokuwa kwenye ‘kapu moja’ na Balozi Kagasheki, ambao Rais Kikwete alisitisha uteuzi wao kutokana na kashfa zilizoibuka wakati wa Operesheni Tokomeza Majangili ni pamoja na Emmanuel Nchimbi (Mambo ya Ndani ya Nchi).

Wengine walikuwa na wizara walizokuwa kwenye mabano ni David Mathayo (Maendeleo ya Mifugo na Uvuvi) na Shamsi Vuai Nahodha (Ulinzi na Jeshi la Kujenga Taifa). 

Taarifa ya Pinda kumshauri Dk Amani ajiuzulu, ilisomwa na Naibu Waziri wa Tawala za Mikoa na Serikali za Mitaa (Tamisemi) Agrey Mwanri.

Mwanri alisoma taarifa hiyo katika mkutano ulioitishwa na ofisi ya Waziri Mkuu, ikiwa ni hitimisho la taarifa ya ukaguzi wa CAG katika manispaa hiyo na ushauri wake kwa serikali.

Pinda, kupitia kwa Mwanri, alisema kufuatia tuhuma zinazomkabili Dk Amani, kusaini mikataba yenye utata ni bora ajiuzulu kwa manufaa ya umma.

Mbali na Dk Amani,  taarifa ya Pinda iliagiza aliyekuwa Mkurugenzi Mtendaji wa manispaa hiyo, aliyehamishiwa wilaya mpya ya Momba mkoani Mbeya, Khamis Kaputa, avuliwe madaraka hayo.

Pia, Pinda aliagiza kuvuliwa madaraka kwa wakuu wa idara za uhandisi, Mhandisi Steven Nzihirwa, kitengo cha manunuzi, Baraka Marwa na Mweka Hazina Amduni Uromi.

Kwa mujibu wa taarifa hiyo, Pinda, aliagiza uongozi wa manispaa hiyo kupitia upya taarifa ya CAG na kutoa maelezo yake kwa Katibu Mkuu (Tamisemi) ndani ya siku saba, baada ya kukabidhiwa taarifa ya CAG.

Kabla ya tamko la Pinda, Utouh aliwasilisha ripoti ya uchunguzi iliyobaini kuwapo mikataba iliyosainiwa na manispaa hiyo, chini ya uongozi wa Dk Amani.

Mikataba hiyo ilibainika kukiuka taratibu za matumizi ya fedha za umma, ikiwamo kutojadiliwa na kikao cha baraza la madiwani.

Utouh, alisema kuwa mikataba hiyo ilisababishia kuzuka kwa mgogoro na hasara kubwa kwa manispaa hiyo, ikiwamo kukosa mapato ya zaidi ya Shilingi milioni 256.2 katika kipindi cha mwaka 2012/2013 na 2013/2014.

Fedha hizo ni ambazo zingetokana na ushuru wa soko kuu la Bukoba, uliosimamishwa kutokana na mgogoro huo.

Baadhi ya mikataba  iliyothibitishwa na CAG kusainiwa kinyume cha utaratibu ni wa ujezi wa soko kuu jipya na la kisasa na ujenzi wa jengo la kitega uchumi lililopo eneo la kituo kikuu cha mabasi.

Miradi mingine ni ujenzi wa kituo kikuu cha mabasi eneo la Kyakailabwa, zabuni ya kukusanya ushuru katika kituo kikuu cha mabasi  na mradi wa upimaji viwanja.

Utouh, alisema Pinda, aliiomba ofisi ya CAG kufanya ukaguzi maalum katika manispaa ya Bukoba, kutokana na kuwapo kutoelewana kulikosababisha makundi na vikao vya kisheria vya madiwani kutofanyika.

Naye Mkuu wa Mkoa wa Kagera, Kanali mstaafu Fabian Massawe, aliwataka madiwani wa halmashauri hiyo na watendaji kuipokea taarifa hiyo na maelekezo ya serikali kwa manufaa ya wananchi wa Bukoba.

Kanali Massawe, alisema kuwa mgogoro huo ambao umedumu kwa zaidi ya mwaka mmoja sasa, umesababisha kukwamisha miradi ya maendeleo ya wananchi.

Kwa mujibu wa Kanali mstaafu Massawe, miongoni mwa miradi hiyo ilipaswa kufadhiliwa na Benki ya Dunia ikiwa na thamani ya Shilingi bilioni 18.5. 

Pia, alisema madiwani wa manispaa hiyo walishindwa kufanya vikao vya kisheria, kikiwamo cha kupitisha mapendekezo ya bajeti ya mwaka 2014/2015.

CHANZO: NIPASHE