WAZIRI MKUU AAGIZA KUFUTWA UMILIKI WA MASHAMBA MAKUBWA 11 WILAYANI NGARA

·         Yana ukubwa ekari 7,700 katika vijiji viwili tu

·         Aagiza Afisa Ardhi arudishwe kutoka Rorya kusaidia uchunguzi

WAZIRI MKUU Kassim Majaliwa ameagiza kufutwa mara moja umiliki wa mashamba makubwa 11 yenye ukubwa wa ekari 7,700  kwenye  vijiji vya Kasharazi na Rwakalemera wilayani Ngara Kagera, ambayo hayana hati na yametelekezwa.

Ametoa agizo hilo leo asubuhi  (Jumatano, Machi 16, 2016) wakati akizungumza na wakazi wa vijiji vya Kasulo na Rwakalemera katika kata ya Kasulo wilayani Ngara akiwa njiani kuelekea mkoa wa Geita.

Waziri Mkuu alilazimika kufanya mkutano huo mapema asubuhi baada ya kuamua kuitisha uongozi wa wilaya ya Ngara ufike kwenye mkutano huo ili kujibu kero za wananchi waliosimamisha msafara wake jana wakati akielekea Ngara mjini.

Uamuzi huo unafuatia hatua ya Waziri Mkuu kumwita kwenye mkutano huo Afisa Ardhi na Maliasili wa Wilaya, Bi. Betty Munuo ili aeleze chanzo cha mgogoro wa ardhi katika vijiji hivyo.

Bi. Munuo ambaye amehamishiwa wilaya hiyo Agosti, mwaka jana,  alisema aliyakuta malalamiko hayo na amefanya uchambuzi wa majina ya wamiliki wote wa mashamba na walikuwa wanapanga kuwapatia notisi ili wajieleze.

Katika orodha yake, Bi. Munuo alitaja wamiliki 18 wa mashamba makubwa lakini kati yao ni wamiliki saba tu ambao mashamba yao yana hati lakini matatu ndiyo yameendelezwa na manne hayajaendelezwa.

Mashamba yaliyoendelezwa yanatumika kwa kilimo,  ufugaji na shule. Nayo yanamilikiwa na Dayosisi ya Rulenge (shamba na. 606 lenye ekari 161 liko Mbuba); Dario Zakaria (shamba na. 639 lenye ekari 282 liko Nyakariba) na Masista wa Mt. Fransisco (shamba na. 234 lenye ekari 759 liko Kasulo).

Mashamba manne yenye hati lakini yametelekezwa ambayo yote yako kijiji cha Rwakalemera ni ya Abdallah Sadala na. 235 lenye ekari 521; Mahsen Saidi shamba na. 333 lenye ekari 458; Mshengezi Nyambele shamba na. 746 lenye ekari 388 na  Mushengezi Nyambele shamba na. 745 lenye ekari 497.

Akitangaza uamuzi wake, Waziri Mkuu aliwataja wamiliki wa mashamba yasiyo na hati kuwa ni Bw. Joseph Rugumyamheto mwenye shamba na. 527 (ekari 505 liko Rwakalemera); Bw. Nicolaus Kidenke shamba halina namba na ukubwa wake haujulikani; Bw. Gwasa Angas Sababili shamba na. 714 (ekari 236 liko Kasharazi);  na Bw. Makumi Adili Rufyega (ekari 500 liko Rwakalemera).

Wamiliki wengine ambao mashamba yao yapo kijiji cha Rwakalemera ni Paulo Shikiri ekari 250; Frank Mukama Derila ekari 750; Godfrey Kitanga ekari 800; Philemon Mpanju ekari 200; Issa Sama ekari 500; Hekizayo Mtalitinya ekari 225 na Joel Nkinga ekari 1,250.

Waziri Mkuu aliagiza ifanyike sensa ili kubaini kama wamiliki wa mashamba hayo yote ni Watanzania au la. "Haya yenye hati nataka yafanyike mapitio ya hati zao na kubainisha ni namna gani walipatiwa hati hizo. Nataka taarifa inifikie ofisini kwangu Dar es Salaam ifikapo tarehe 20 Machi, 2016," alisema.

Ili kukamilisha kazi hiyo, Waziri Mkuu ameagiza kurejeshwa mara moja kwa aliyekuwa Afisa Ardhi wa Wilaya hiyo, Bw. Enock Mponzi ambaye amehamishiwa Halmashauri ya Wilaya ya Rorya ili aje asaidie uchunguzi wa ugawaji wa maeneo hayo.

Alimtaka Mwenyekiti wa kijiji cha Rwakalemera, Bw. Brighton Kemikimba aitishe mkutano wa kijiji kabla ya tarehe 31 Machi 2016 na abainishe mashamba yote makubwa ambayo yanazidi ekari 50. Pia afuatilie kama yana kibali cha Baraza la Madiwani.

Wakati huohuo, Waziri Mkuu ameagiza kusimamishwa kazi kwa aliyekuwa Mkurugenzi wa Halmashauri ya Wilaya ya Ngara, Bw. Colnel Ngudungi na kutaka arejeshwe wilayani humo kujibu tuhuma za kuhusika na upotevu wa fedha za mauzo ya mbao kutoka kwenye msitu wa Rumasi, wilayani humo.

Kaimu Katibu Tawala wa Mkoa wa Kagera,  Bw. Adam Swai ameagizwa kumwandikia  barua Katibu Tawala wa Mkoa wa Shinyanga ili atekeleze maagizo hayo na Bw. Ngudungi arejeshwe Ngara kujibu tuhuma hizo. Bw. Ngudungi alihamishwa  kwenda Sekretarieti ya Mkoa wa Shinyanga,  Agosti 2015.

Akiwa njiani kuelekea Ngara jana mchana (Machi 15, 2016), waziri Mkuu alisimamishwa katika kijiji cha Rwakalemera na wananchi wenye mabango wakiomba kurejeshewa ardhi ya kijiji huku baadhi yao wakidai wanatishiwa na bunduki pindi wakisogelea mashamba hayo makubwa.

Pia walidai kuuzwa kwa msitu wa Rumasi na mapato kutojulikana yalipokwenda huku wakidai kuwa kijiji chao hakipati mapato yoyote kutokana na minada ya ng’ombe inayofayika kijijini hapo wakati sharia inataka asilimia 20 ya mapato ibakizwe kijijini.

(mwisho)

IMETOLEWA NA:

OFISI YA WAZIRI MKUU

JUMATANO, MACHI 16, 2016.

HATIMAYE MWIGULU NCHEMBA AANZA KUTRANSFORM UFUGAJI HOLELA KWENDA UFUGAJI WA KISASA "BLOCKS"

Waziri wa Kilimo,Mifugo na Uvuvi Mh:Mwigulu Nchemba akimuangalia mmoja wadume  la ng'ombe anayetumika kuzalisha Mitamba kwenye kitaru namba 9 shamba la kitengule-Karagwe.Baadhi ya ng'ombe waliopo kitaru namba 9 shamba la kitengule ambapo kwenye block hii moja kuna Ng'ombe zaidi ya 800 wanaolishwa na kuhudumiwa vizuri na mmiliki wa kitaru hiki.Ng'ombe wakitoka kuogeshwa kwaajili ya kuua baadhi ya wadudu kama kupe wanaopendelea kukaa kwenye mwili wa ng'ombe.Hili ni moja ya josho la kisasa ndani ya kitaru namba 9.

Kufuatia ziara ya waziri mkuu,Mh:Kassim Majaliwa ndani ya mkoa wa Kagera akiwa ameambatana na waziri wa Kilimo,Mifugo na Uvuvi pamoja na Naibu Waziri wa Mambo ya ndani,Ziara hiyo imekuja na maagizo kadhaa ikiwamo wamiliki wote wa vitaru kwenye ranchi za Taifa ambao hawajaziendeleza waziachie mara moja na maeneo hayo yagawiwe upya,Waziri Mkuu ameagiza pia kwa wamiliki wa vitaaru ambao sio watanzania wajisalimishe au waondoke kwenye vitaru hivyo kabla hatua kali hazijaanza kuchukuliwa.

Waziri wa Kilimo,Mifugo na Uvuvi Mh:Mwigulu Nchemba akiwa na timu yake ya wataalamu wameshaanza kupitia vitaru vyote "blocks" na wamiliki wake ikiwepo pia idadinya mifugo kwa kila block,Hii leo Mwigulu Ncheba amekutana na wamiliki wa vitaru kwenye shamba la Kitangile-Karagwe na kuagiza wamiliki wote ambao hawajaendeleza maeneo wanayoyamiliki yanachukuliwa na serikali kwaajili ya kuwapatia watanzania wenye uwezo wa kuziendesha.

Mwigulu Nchemba ameagiza pia wamiliki wa vitaru kuacha mchezo wa kukodisha na kuingiza mifugo kutoka kwa wafugaji haramu wa nchi jirani,kitendo hicho ni kosa na yeyote atakayebainika anakwenda jela na adhabu kali itafuta.

Mbali na vitaru hivyo,Waziri Mkuu akishirikiana na waziri wa kilimo wameagiza ofisi ya mkuu wa mkoa wa kagera kuondoa wavamizi wote kwenye pori tengefu ya serikali kabla hatua zingine zinazofuata kuanza kutekelezwa.

Kupitia uwekezaji mzuri kwenye kitaru namba 9 cha shamba la Kitengule,Mwigulu Nchemba ametoa rai kwa wafugaji wote nchini kuanza kujipanga kufuga kwa mfumo wa vitaru ili kuachana na ufugaji holela unaopelekea migogoro mbalimbali na wakulima.

Picha/Maelezo na Festo Sanga Jr.

WAZIRI MKUU AMPA RAS KAGERA SIKU 5 AMLETEE TAARIFA

*Ni za matumizi ya sh. milioni 120 za Hospitali ya Mkoa

WAZIRI MKUU Kassim Majaliwa amekagua hospitali ya rufaa ya mkoa wa Kagera na kumpa siku tano Kaimu Katibu Tawala wa Mkoa huo, Bw. Adam Swai amletee taarifa juu matumizi ya sh. Milioni 80 ambazo ni fedha za UKIMWI.

Pia amemtaka ifikapo Machi 20, nwaka huu awasilishe taarifa nyingine ya matumizi ya sh. Milioni 40 za ukarabati wa jengo la wagonjwa maalum  (Grade A)

Ametoa agizo hilo leo asubuhi (Jumanne,  Machi 15, 2016) wakati akizungumza na watumishi wa hospitali hiyo baada ya kutembelea maeneo kadhaa yakiwemo wodi ya watoto, wodi ya wazazi, chumba cha wagonjwa mahututi (ICU ) na chumba cha kuhifadhia maiti.

"Kulikuwa na frsha za ukimwi sh. Milioni 80 ambapo kila mtumishi alipaswa kupata sh. 200,000/- lakini ninyi mmewapa sh. 80,000 /-. RAS fedha hizi zimeenda wapi?  Nataka uniletee taarifa ofisini kwangu Dar es Salaam ifikapo tarehe 20 mwezi huu," alisema huku akishangiliwa.

"Kwa mujibu wa taarifa ya CAG pale grade A kuna mgogoro wa sh. milioni 40. Wewe taarifa unayo lakini hujaifanyia kazi yoyote.  Nataka tarehe 20 nayo hii pia niipate na nione umetoa mapendekezo gani."

Kuhusu tatizo la madaktari katika hospitali hiyo, Waziri Mkuu alisema atawasiliana na Waziri wa Afya ili madaktari watano ambao wanasubiri ajira rasmi lakini wameanza kazi kwa mkataba hospitali hapo wapewe ajira rasmi. Pia alisema amebaini upungufu wa madaktari bingwa uliopo katika hospitali hiyo.

Pia aliahidi kufuatilia maombi yao ya gari la wagonjwa hasa ikizingatiwa kuwa anayo maombi kama hayo kutoka hospitali za Mawenzi (Kilimanjaro), na Ligula (Mtwara).

Katika hatua nyingine,  Waziri Mkuu aliwapongeza watumishi wa hospitali hiyo kwa huduma zao nzuri wanazotoa kwa wagonjwa.  "Nineridhishwa na kauli walizotoa wagonjwa juu yenu. Tofauti na hospitali nyingine nilizopita, wao wamesema hawajatozwa fedha ili wapatiwe dawa. Nimefarijika sana."

"Endeleeni kuwa na huruma kwa wagonjwa. Endeleeni kuwa na lugha nzuri kwa wagonjwa. Hawa wagonjwa hawakuogopa kuelezea hisia zao. Wamesema kwa uwazi kabisa kwamba mnawajali," alisema.

Mapema,  akisoma taarifa mbele ya Waziri Mkuu,  Mganga Mkuu wa Mkoa huo, Dk.  Thomas Rutachunzibwa alisema hospitali hiyo inakabiliwa na upungufu mkubwa wa madaktari bingwa pamoja na madaktari wa kawaida.

"Tunao madaktari 10 lakini wanaohitajika ni 30. Tunao madaktari wasaidizi wanane lakini wanaohitajika ni 23 na madaktari bingwa waliopo ni watatu tu lakini wanaohitajika ni 24. Tunaomba tupatiwe watumishi hawa ili tuweze kutoa huduma kulingana na matarajio ya wananchi wetu," alisema.

Akifafanua kuhusu mahitaji ya hospitali hiyo, Dk. Rutachunzibwa alisema wanahitaji sh. bilioni 1.8 kwa mwaka bila ya kuweka mishahara ili waweze kufanya kazi yao kwa umakini. "Tunahitaji sh. milioni 802 kwa ajili ya matumizi ya kawaida lakini tunachopokea hivi sasa ni sh. milioni 299 ambayo ni sawa na asilimia 30 ya mahitaji yetu."

"Bajeti ya dawa tuliyotenga ni sh. milioni 960 lakini tunapokea sh. milioni 143 ambazo kiuhalisia zinatosha kwa matumizi ya miezi miwili tu. Tumelazimika kufanya marekebisho ya bei za dawa kwa ridhaa ya Bodi ya hospitali ili tuweze kumudu kutoa huduma kwa wananchi," alisema.

Alisema ili kubana mianya ya upotevu wa mapato, wanahitaji kuwa na kompyuta 15 lakini hadi sasa wamefanikiwa kununua kompyuta mbili tu ambazo ziko Grade A na idara ya wagonjwa wa nje (OPD) ili kuimarisha utaratibu wa ukusanyaji mapato.

IMETOLEWA NA:

OFISI YA WAZIRI MKUU

JUMANNE, MACHI 15, 2016.

WAZIRI MKUU ATOA POLE KWA PROFESA ANNA TIBAIJUKA(MB) KWA KUFIWA NA MAMA YAKE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 Waziri Mkuu wa Jamhuri ya Muungano wa Tanzania,  Kassim Majaliwa,akiweka saini katika kitabu cha maombolezo ya msiba wa mama wa Mbunge wa Muleba Kusini,Profesa Anna Tibaijuka, alipofika kutoa pole kwa wafiwa.Katikati ni Naibu Waziri wa Nishati na Madini,Dk. Medard Kalemani na anayefuatia ni Naibu Waziri wa Wizara ya Mambo ya Ndani ya Nchi,Mhandisi Hamad Masauni ,ambao waliongozana na Waziri Mkuu kwenda kutoa pole kwa wafiwa.

 Waziri Mkuu wa Jamhuri ya Muungano wa Tanzania,Kassim Majaliwa(kulia),akimpa pole Mbunge wa Muleba Kusini,Profesa Anna Tibaijuka,ambaye amefiwa na mama yake.Waziri Mkuu yuko mkoani Kagera kwa ziara ya kikazi.

Naibu Waziri wa Wizara ya Mambo ya Ndani ya Nchi,Mhandisi Hamad Masauni(kulia),akimpa pole Mbunge wa Muleba Kusini,Profesa Anna Tibaijuka, aliyefiwa na mama yake,marehemu Aurelia Kajumulo.(Picha zote na Wizara ya Mambo ya Ndani ya Nchi)

Majaliwa azungumza na watumishi wa serikali, viongozi wa dini na wadau wa maendeleo wa mkoani Kagera

Waziri Mkuu, Mhe. Kassim Majaliwa amekutana na watumishi wa serikali, viongozi wa dini na wadau mbalimbali wa maendeleo mkoani Kagera akiwa yupo mkoani humo katika ziara zake za kukagua shughuli mbalimbali za maendeleo.

Baadhi ya watumishi wa serikali, viongozi wa dini na wadau wa maendeleo wa mkoa wa Kagera wakimsikiliza Waziri Mkuu, Kassim Majaliwa  wakati alipozungumza nao kwenye ukumbi wa ELCT mjini Bukoba akiwa katika ziara ya mkoa wa Kagera Machi 13, 2016. (Picha na Ofisi ya Waziri Mkuu)

RC ATOA SIKU 21 KWA TASAF III

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Mkuu wa Mkoa wa Kagera, John Mongela.

MKUU wa Mkoa wa Kagera, John Mongella ametoa siku 21 kwa watendaji, waratibu wa Mfuko wa Maendeleo ya Jamii (TASAF) na maofisa maendeleo ya jamii kwenda kila kitongoji na kuitisha mikutano upya ya kuwatambua walengwa wa mpango wa Tasaf III walioingizwa mwanzoni kama ni kaya maskini kweli.

Mongella alisema ameamua kutoa agizo hilo jana baada ya kufanya ziara katika wilaya nne za mkoa huo za Missenyi, Karagwe, Kyerwa na Ngara na kutembelea walengwa wa mradi huo kuona maendeleo kutokana na fedha hizo na kuambulia malalamiko kutoka kwa wananchi kuhusu utaratibu uliotumika kutambua kaya maskini.

Wananchi hao walidai kuwa utaratibu haukuwa wazi na ulikiukwa. Pia alisema baadhi ya wananchi walisema baadhi ya walioingizwa kwenye mpango ni watu wenye uwezo, wengine wake za viongozi na wahamiaji haramu huku baadhi ya watu wakionesha kutoelewa vizuri malengo ya mradi huo.

Alisema pia ni vyema kutoa elimu vijijini juu ya lengo kuu la mpango wa Tasaf III kwani katika maelezo ya baadhi ya wananchi hasa walengwa wameonesha kutoelewa vizuri huku baadhi yao wakipata fedha na kuishia kwenye ulevi wa pombe bila kuanzisha mradi utakaowasaidia kujiondoa katika umaskini wa kipato pindi mradi utakapoisha.

Alisema pia wapo baadhi ya wananchi wenye uwezo ambao 
wanalalamika kuona wamebaguliwa kwa kutoingizwa kwenye mradi huo, jambo linaloonesha wananchi hawajapata elimu ya kutosha kuhusu walengwa wa mradi huo.
“Kwanza mnapaswa kabla ya kutoa fedha wakati wa zoezi la uhaulishaji, kutoa elimu kwa muda wa saa mbili na baada ya zoezi kuisha nendeni vijijini, kazi yenu sio kugawa fedha tu mkimaliza mnalala na kusubiri mpaka fedha nyingine iletwe mkagawe.
“Sasa nawaagiza baada ya wiki moja toka zoezi kumalizika nendeni vijijini mkawaelimisheni waanzishe miradi midogo midogo itakayo wasaidia baada ya mradi kuisha kwani baada ya miaka mitatu muda wao utaisha wataingizwa walengwa wengine wapya,” aliagiza mkuu wa mkoa.

Aidha, ameagiza watendaji wa Tasaf, watendaji wa kata na wakurugenzi wote wa Halmashauri za wilaya hasa Kyerwa na Karagwe ambako kumeonekana kuna ubadhirifu wa fedha, kukamata watuhumiwa na kuwahoji na endapo watabainika na tuhuma wafikishwe mahakamani.
CHANZO: GAZETI LA HABARI LEO.

MGANGA MKUU ASAFISHWA KASHFA YA FEDHA BUKOBA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mkuu wa Mkoa wa Kagera, John Mongela (wa pili kutoka kushoto) akishuhudia mgao wa fedha kwa kaya masikini mkoani humo.

MWENYEKITI wa Halmashauri ya Wilaya ya Bukoba, Murshid Ngeze amesema aliyekuwa Mganga Mkuu wa Halmashauri ya Wilaya hiyo (DMO), Dk Hamza Mgula hahusiki na tuhuma za kubadili matumizi ya fedha za Halmashauri hiyo zilizosababisha watumishi saba kusimamishwa kazi.

Januari 28, mwaka huu, Baraza la Madiwani la Halmashauri ya Wilaya ya Bukoba lilipendekeza kusimamishwa kwa watumishi saba kwa lengo la kupisha uchunguzi kutokana na kubadili matumizi ya fedha Sh milioni 851 za miradi ya maendeleo na ukosefu wa baadhi ya nyaraka za uhamisho wa fedha hizo.

Awali, Mwenyekiti huyo alilieleza gazeti hili kwa simu kuwa Dk Mgula ambaye sasa yuko Manispaa ya Bukoba ni miongoni mwa watumishi hao ambao wamesimamishwa kazi, lakini baadaye alieleza kuwa DMO huyo hahusiki, kwani Baraza hilo liliamua kuwasimamisha watumishi hao saba.

“Katika taarifa zilizotolewa mwanzo na kuandikwa katika vyombo mbalimbali zilimhusisha aliyekuwa DMO wa Halmashauri hiyo kwa kipindi cha nyuma ambaye sasa ni Mganga wa Manispaa ya Bukoba Dk Hamza Mgula, mtumishi huyo hahusiki na tuhuma hizo na si mtumishi wa Halmashauri hii,” alieleza Mwenyekiti Ngeze katika barua ambayo aliviandikia vyombo vya habari kufafanua suala hilo.

Kwa mujibu wa Ngeze, waliosimamishwa ni Mweka Hazina wa Wilaya, Jonathan Katunzi, Kaimu Mweka Hazina wa Wilaya, Selialis Mutalemwa, Mhandisi wa Wilaya, Robert Massoro na Fundi Sanifu Mkuu wa Wilaya, Desu Bizibu. Aliwataja wengine kuwa ni Ofisa Elimu Sekondari Wilaya, Lucas Mzungu, Ofisa Mipango wa Wilaya, Mustapha Sabuni na Mganga wa Mifugo wa Wilaya, Dk Kisanga Makigo.

Aidha, Mwenyekiti huyo alisema Mkurugenzi Mtendaji (DED) aliyekuwepo Gladys Ndyamvunye ambaye amehamishiwa mkoani Pwani akitakiwa kurudishwa kujibu tuhuma zinazomkabili.

Alisema baraza hilo limewasimamisha kazi watumishi saba wa Idara mbalimbali kutokana na mapendekezo ya timu iliyoundwa na Mkuu wa Mkoa wa Kagera, John Mongella ili kufanya uchunguzi juu ya tuhuma za ubadhirifu wa zaidi ya Sh milioni 851 zilizokuwa zimepangwa katika utekelezaji wa miradi mbalimbali ya maendeleo.

Pamoja na kuchukua hatua za kinidhamu kwa watumishi hao, Baraza hilo la madiwani wa Halmashauri ya Wilaya ya Bukoba limemtaka Katibu Mkuu Tamisemi kumchukulia hatua za kinidhamu Ndyamvunye kwa kosa la kutosimamia ipasavyo fedha hizo.

Kwa mujibu wa taarifa ya uchunguzi chini ya uenyekiti wa Mhandisi Wambura Sabora, fedha zinazodaiwa kufujwa ama kubadilisha matumizi ni Sh milioni 168 za Mfuko wa Jimbo, Sh milioni 200 kama ombi maalum la ujenzi wa Daraja la Kyamabale, Sh milioni 176 za Mfuko wa Barabara na Sh milioni 307 zilizotolewa na wafadhili katika Mfuko wa Afya.

CHANZO : HABARI LEO.

BENKI YASUASUA MALIPO YA KAYA MASIKINI.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

WALENGWA wa Mpango wa Uhawilishaji wa fedha za ruzuku kwa kaya masikini unaotekelezwa na Mfuko wa Maendeleo ya Jamii (Tasaf) III wa kunusuru kaya masikini wilayani Kyerwa, wamelalamikia ucheleweshwaji wa fedha kutoka benki wakati wa malipo ambao umeonekana kuwa kero na kuwakatisha tamaa wahusika hao.

Walitoa malalamiko hayo kwa Mkuu wa Mkoa wa Kagera, John Mongella aliyefanya ziara ya siku moja kwa lengo la kupata maelezo juu ya maendeleo ya mpango na mafanikio yaliyofikiwa na kutafuta ufumbuzi juu ya changamoto zinazokabili mpango huo ili malengo ya Serikali ya kupunguza umasikini yafikiwe kwa asilimia 100.

Mkazi wa kijiji cha Mulongo, Adelina Danstan alisema mwanzoni wakati wanaingizwa katika mpango huo walielezwa kuwa dirisha la malipo linafunguliwa na kufungwa ndani ya siku nne, lakini kwa Wilaya ya Kyerwa ni tofauti ambapo hufunguliwa siku nne lakini malipo hufanyika siku mbili au moja usiku na mchana.

“Wenzetu wakianza kupata malipo sisi hushinda vituoni siku mbili jua kali au mvua ikiwa halali yetu tukisubiri malipo ambapo tunalazimika kuwauliza wahusika wa Tasaf ambao tunaelezwa kuwa benki ndiyo inayokwamisha na kusababisha hali hiyo hata wao hawapendi hali hiyo itokee,” alieleza Dastan.

Mkazi wa kijiji cha Rwabikagati, Catherine Binomutonzi alisema kutokana na adha hiyo inayoelezwa kuwa inasababishwa na benki kutotoa kipaumbele kwa wilaya hiyo husababisha walengwa kuhudhuria vituoni siku mbili na kutoka patupu; na siku ya tatu jioni ndipo fedha zinapoletwa na kuanza kugawiwa mpaka usiku.

“Hali hii inakatisha tamaa na kuona kama tunadharauliwa kwa kuwa ni masikini, kwa hiyo tunakuomba Mkuu wa Mkoa kuingilia kati na kuona ni sababu zipi zinakwamisha. Kumbuka ucheleweshwaji huo unasababisha msongamano, wazee hapa wanashindwa kubaki mpaka usiku wakihofia maisha yao kuwa hatarini kwani wanaweza kukabwa na vibaka usiku kwa hiyo wanalazimika kuondoka na kuiacha fedha,” alisema Binomutonzi.

CHANZO ; HABARI LEO.

MAUAJI YA DIWANI MULEMA YACHOCHEA VURUGU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Kamanda wa Polisi Mkoa wa Kagera, Augustine Ollomi.

Baadhi ya wakazi wa kata ya Kimwani, Muleba mkoani Kagera, wamevamia, kuharibu mali na kuchoma moto nyumba nane katika tukio linalohusishwa na ulipaji kisasi na chuki za kisiasa.

 

Hatua hiyo imekuja siku moja baada ya kutokea mauaji ya diwani wa kata hiyo. Sylvester Muliga (55) kupitia CUF.

 

Mwenyekiti wa kijiji Kyota lilipotokea tukio hilo, Daud Kiluma, alisema wananchi hao walivamia nyumbani kwa aliyekuwa mgombea udiwani wa CCM, Alex Rwakayonza, wakimtuhumu kuhusika na mauaji hayo na kuharibu mashine ya kusaga nafaka pamoja na mashine nyingine ya jirani.

 

Kiluma alisema wananchi hao walivamia nyumba hiyo na kuanza kubomoa milango na kuingia ndani kisha kuchoma moto mali zilizokuwamo na hatimaye kufyeka migomba na kuvunja vioo vya gari lake.

 

Alisema baada ya hapo, wananchi hao walikwenda kwa washirika wa karibu wa Rwakayonza, akiwamo mtoto wake, na kuchoma moto nyumba nane za watu hao.

 

Kamanda wa Polisi Mkoa wa Kagera, Augustine Ollomi, alithibitisha kuwapo kwa tukio hilo na kwamba jeshi la polisi limeimarisha ulinzi katika eneo hilo.

 

Aidha, Kamanda Ollomi alisema katika tukio la mauaji ya diwani huyo, hadi jana watu watatu walikuwa wamekamatwa, baada ya mmoja kukamatwa jana. Miongoni mwa watuhumiwa waliokamatwa ni Adelard Anthony (42) na Shilanga Gunzari (22)

Diwani Muliga alivamiwa nyumbani kwake usiku wa kuamkia juzi na  kukatwa katwa mapanga sehemu mbalimbali za mwili wake.

Kamanda Ollomi alisema diwani huyo, wakati akiangalia taarifa ya habari saa mbili usiku nyumbani kwake, watu wasiofahamika waliingia wakiwa na silaha mbalimbali za jadi na kuanza kumshambulia.

 

Majirani walipopata taarifa za kuvamiwa kwa diwani huyo, walifika nyumbani kwake kwa lengo la kumpatia msaada lakini walikuta tayari amejeruhiwa vibaya, hivyo kumuwahisha katika hospitali ya Kagondo  kwa ajili ya matibabu. 

 

Kutokana na majeraha makubwa aliyokuwa ameyapata, ilipofika saa saba usiku, alifariki dunia wakati madaktari wakiendelea kuokoa maisha yake.

CHANZO: NIPASHE

8 WASIMAMISHWA KAZI BUKOBA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mkuu wa Mkoa wa Kagera, John Mongela

BARAZA la Madiwani la Halmashauri ya Bukoba, limewasimamisha watumishi wanane kutokana na ufisadi wa Sh milioni 851 zilizotolewa na Serikali pamoja na wafadhili kwa ajili ya miradi ya maendeleo.

Aidha, Mkuu wa Mkoa wa Kagera, John Mongella ameagiza kuchukuliwa hatua za kijinai kwa watendaji wote waliohusika. Mongella alishtushwa na taarifa ya tume iliyoundwa na uongozi wa mkoa huo kuchunguza matumizi ya fedha hizo kwa ajili ya maendeleo ya halmashauri hiyo.

Kutokana na hali hiyo, Baraza la Madiwani la halmashauri hiyo limekaa kikao cha dharura na kuwasimamisha watumishi hao ili kupisha uchunguzi. Waliosimamishwa ni aliyekuwa Mganga Mkuu (DMO), Hamza Mgula kabla ya kuhamishiwa Manispaa ya Bukoba, Idara ya Fedha ni Mweka Hazina, Jonathan Katunzi na Selialisi Mtalemwa, Kitengo cha Ujenzi; Robert Massoro na Deus Bizibu, Ofisa Mipango na Ofisa Elimu Sekondari, Lucas Mzungu, Idara ya Mipango, Mustapha Sabuni na Idara ya Mifugo, Dk Kisanga Makigo.

Hali hiyo ilikuja wakati Mwenyekiti wa Tume ya watu sita, Wambura Sabora kutoa taarifa katika kikao maalumu cha madiwani, watumishi wa halmashauri hiyo, wakuu wa idara kutoka mkoani na mkuu huyo wa mkoa juu ya waliyobaini ndani ya siku nne walizofanya ukaguzi na uchunguzi ambapo walidai kubaini madudu.

“Katika uchunguzi tulibaini kuwa fedha kutoka Basket Fund milioni 307 zilizotolewa na Serikali 2011/2012 kwa ajili ya kununulia dawa katika hospitali na vituo vya afya zilihamishwa na kutumika tofauti na malengo bila kufuata taratibu zinazostahili huku milioni 200 za Mfuko wa Barabara zilizotolewa 2014 kwa ombi maalumu ambazo zilizotolea kwa mfumo wa kibajeti hazikutumika kama ilivyokusudiwa na badala yake zilihamishiwa sehemu nyingine ikiwemo matumzi ya ofisi,” Wambura alisema.

Alitaja fedha nyingine kuwa ni Sh milioni 168 za Mfuko wa Jimbo ambazo pia zimetumika katika shughuli nyingine, bila idhini ya kikao chochote wala nyaraka inayoonesha kuhamishwa kwa fedha hiyo jambo ambalo ni kosa kisheria kwani ni matumizi yanayotia shaka.

Baada ya Mkuu wa Mkoa kupata taarifa hiyo, aliwataka Mweka Hazina, John Katunzi kutoa maelezo, na akakiri kuwepo kwa upungufu huo huku akibainisha walibadilisha matumizi ya fedha hiyo baada ya kukaa na Mkurugenzi wakati huo Glades Ndyamvunye.

Inaelezwa kuwa walipanga kurudisha fedha hizo lakini hadi sasa hazijarudishwa. Pamoja na hayo, alimwagiza Mkuu wa Taasisi ya Kupambana na Kuzuia Rushwa (Takukuru) Mkoa, Joseph Mwaiswelo na Kamanda wa Polisi wa Mkoa huo kuwachukulia hatua zaidi watuhumiwa kwa yale yatakayobainika kuwa ya kijinai.

CHANZO ; HABARI LEO.

FLAVIANA MATATA FOUNDATION YATOA MSAADA SHULE YA MSINGI

Flaviana Matata akikabidhi mabegi ya shule kwa watoto wa shule ya Msingi ya Msinune ambapo ameteuliwa kama mlezi wa shule hiyo kwa mwaka wa tatu sasa.

Mkuu wa shule Bukoba avuliwa cheo kwa kutoza michango

Katibu Tawala wa Mkoa wa Kagera, Nassoro Mnambila

MKUU wa Shule ya Sekondari ya Bilele ya Mjini Bukoba, mkoani Kagera, Siasa Phocus amevuliwa madaraka kwa madai ya kuendelea na msimamo wa kutaka wazazi wenye watoto shuleni hapo, waendelee kutoa michango kinyume na agizo la serikali.

Katibu Tawala wa Mkoa wa Kagera, Nassoro Mnambila aliliambia gazeti hili jana mjini hapa kwamba mwalimu huyo alishapewa utaratibu wa kuzingatia sera ya utoaji elimu msingi bure, lakini alikaidi.

“Kwa mamlaka niliyonayo, nachukua hatua hii kwa kumvua mamlaka mkuu wa shule Bilele kutokana na kushindwa kutekeleza maelekezo yaliyotolewa na serikali…,” alisema Mnambila.

Alisema mwalimu huyo aliendelea na msimamo wa kuwaambia baadhi ya wazazi waliofika kuuliza utaratibu wa michango, kwamba hana taarifa na miongozo ya serikali, akiwasisitiza kila mzazi kutimiza mahitaji yaliyopo kwenye fomu ya mwanafunzi.

“Mwalimu huyo aliendelea kutoa fomu kwa kila mwanafunzi iliyoainisha kila mahitaji kama ilivyokuwa hapo awali (miaka ya nyuma) huku akitaka michango ya madawati, karatasi za kuchapia mitihani na mlolongo wa gharama nyingine nyingi,”alisema Katibu Tawala.

Michango mingine ambayo wanafunzi wa sekondari wamekuwa wakitozwa kila mwaka ni ya fyekeo, ndoo, jembe, uji, chakula cha mchana na uzio.

Katibu tawala alionya walimu wakuu na wakuu wa shule, kuzingatia na kutekeleza sera ya utoaji wa elimu msingi bure, kama ilivyo kwenye taratibu za miongozo iliyotolewa kwao katika idara ya elimu.

Fedha zafika mikoani

Wakati huo huo, mikoa mbalimbali imethibitisha kupokea fedha zilizotolewa na Serikali kwa ajili ya utekelezaji wa mpango wa elimu bure. Jumla ya Sh bilioni 18.77 zimetolewa na serikali kwa ajili ya shule zote za umma nchini.

Miongoni mwa mikoa iliyothibitisha kwa waandishi wa habari kupokea fedha zilizotolewa na serikali kwa ajili ya kutekeleza elimu msingi bila malipo ni pamoja na Kagera, Morogo, Rukwa na Mwanza.

Ofisa Elimu wa Mkoa wa Kagera, Aloyce Kamamba alisema wamepatiwa jumla ya Sh 810,157,000 ambazo zimeshaelekezwa kwenye akaunti za shule zilizoko mkoani humo, ambapo za msingi ni 888 na sekondari 190. Kati ya hizo, 17 ni sekondari za bweni. Kiasi hicho kimetolewa na serikali kwa ajili ya kugharimia huduma mbalimbali ikiwemo chakula.

Mkoani Rukwa, Mkuu wa Mkoa, Magalula Said Magalula alisema wamepokea Sh milioni 336 ambapo Sh 143,859,000 zimepelekwa kwenye shule za msingi 360 na kiasi kilichobaki, kimepelekwa shule 105 za sekondari. Kwa mujibu wa Magalula, fedha hizo ni kwa ajili ya mwezi huu kwani kila mwezi serikali itakuwa ikitoa fedha kwa ajili ya mpango huo.

Mkuu wa Shule ya Sekondari Kalangasa Manispaa ya Sumbawanga, Gabriel Hokororo, alikiri shule yake kupokea Sh milioni 1.4 kwa ajili ya Januari mwaka huu. Katika Mkoa wa Morogoro, Katibu Tawala Msaidizi wa mkoa huo anayeshughulikia elimu, Wariambora Nkya, alithibitisha kupokea Sh milioni 724.7 kwa ajili ya shule 846 za msingi na 179 za sekondari za bweni na kutwa.

Mkoa mwingine uliothibitisha kupokea fedha hizo ni Mwanza wenye shule za sekondari 197, ambazo zimepewa Sh 642,648,000 kwa ajili ya fidia ya ada za kutwa na bweni na chakula kwa shule za bweni. Mkuu wa Mkoa wa Mwanza, Magesa Mulongo alisema upande wa Shule za Msingi, zipo 850 ambazo zimepokea Sh milioni 356,728,000.

Alisema hadi Desemba 30 mwaka jana, shule zote zilishawekewa fedha kwenye akaunti zake.

Wahadharishwa matumizi

Walimu wakuu, wakuu wa shule, bodi wamesisitizwa juu ya matumizi sahihi ya fedha hizo na wakati huo huo kuzingatia maelekezo ya serikali ya kuhakikisha elimu msingi inatolewa bure.

Licha ya wakuu wa mikoa na idara ya elimu kuhadharisha juu ya hilo, pia Wizara ya Fedha na Mipango hivi karibuni, ilionya wakuu wa shule za msingi na Sekondari watakaotumia ovyo fedha hizo zilizotolewa na serikali kutoa elimu bure, ikisema atakayebainika kuzitumia isivyo, atashughulikiwa.

Waziri wa Fedha na Mipango, Dk Philip Mpango iliwataka walimu katika kuhakikisha fedha hizo zinatumika ipasavyo, waweke wazi fedha walizopokea kutoka serikalini wananchi wafahamu alichopewa na matumizi yake.

Bodi za shule zimepewa kazi ya kuhakikisha zinasimamia matumizi na kutoa taarifa. Pia wakuu wa wilaya, mikoa na wakurugenzi wamepewa wajibu wa kusimamia fedha hizo Sh bilioni 14.7, ambazo kati yake, Sh bilioni tatu zimepelekwa katika vyombo vya usimamizi wa mitihani.

HABARI LEO

SERIKALI YATOA TAMKO KUHUSU MISAADA ILIYOKATALIWA‏ -NI PAMOJA NA ULE ALIOTOA MH. RWAKATALE (MB)

Na Magreth Kinabo –Maelezo

Katibu Mkuu wa Wizara ya Afya, Maendeleo ya Jamii, jinsia, Wazee na Watoto Dkt. Mpoki Ulisubisya amesema misaada inayotolewa na watu mbalimbali kwa ajili ya kusaidia jamii ni lazima iwe imekidhi viwango vya ubora, hivyo haitakiwi kuangaliwa kwa vigezo vya dini, itikadi wala siasa.

 Kauli hiyo imetolewa leo na Katibu huyo wakati akizungumza na waandishi wa habari ofisi kwake baada kituo kimojwapo nchini kukataa misaada iliyotolewa na Mbunge wa Bukoba Mjini (Chadema), Wilfred Lwakatare wa Chama cha Wananchi(CUF), hivi karibuni.

 Dkt. Ulisubisya  alisema hivi karibuni gazeti moja la kila siku la hapa nchini liliripoti kwamba misaada iliyotolewa na Mbunge huyo, katika baadhi vituo afya Zahanati  kwa ajili ya wajawazito  kukataliwa.

“Serikali ina sera ya kusaidia jamii hususan misaada inayotolewa  kwenye huduma za afya, ambayo inakidhi viwango vya ubora kulingana Sheria , kanuni na taratibu za Mamlaka ya Chakula na Dawa(TFDA),” alisema Katibu Mkuu huyo.  

Kwa mujibu wa chanzo kimoja cha habari kiliripoti kwamba baadhi ya wakuu wa vituo vya afya na zahanati katika Manispaa ya Bukoba, wamegoma kupokea misaada kwa ajili ya wajawazito uliotolewa na kwa madai ya kupewa maelekezo na Serikali.

Dkt. Ulisubisya aliwataka watendaji wa afya wa vituo hivyo kuwa wasiangalie misaada hiyo kwa misingi ya dini, itikadi na kisiasa.
Hata hivyo Katibu Mkuu huyo aliwataka watu mbalimbali wenye lengo la kutoa misaada katika vituo vya afya kuhakikisha kwamba imekidhi viwango viliyowekwa na Mamlaka ya Chakula na Dawa (TFDA).

 Katika hatua nyingine aliyekuwa Katibu Mkuu wa wizara hiyo, Dkt. Donan Mmbando alikabidhi ofisi hiyo kwa Katibu Mkuu huyo mpya.

    

MISAADA YA MBUNGE LWAKATARE (CHADEMA ) YAKATALIWA HOSPITALINI

Baadhi ya wakuu wa vituo vya afya na zahanati katika Manispaa ya Bukoba, wamegoma kupokea misaada kwa ajili ya wajawazito uliotolewa na Mbunge wa Bukoba Mjini (Chadema), Wilfred Lwakatare kwa madai ya kupewa maelekezo na Serikali.

Mbunge huyo mwishoni mwa wiki alikuwa akisambaza vifaa tiba katika vituo vya afya na zahanati, lakini wasimamizi walikataa kuvipokea, huku wengine wakikimbia wakidai walipewa maelekezo na viongozi wao kutovipokea.

Katika hali ya kushangaza Kaimu Mkurugenzi wa Manispaa ya Bukoba, Richard Mihayo ambaye alikuwa katika msafara wa mbunge huyo alitoweka ghafla baada ya kufika Kituo cha Afya cha Zamzam, huku Kaimu mganga, Samwel Chaba akigoma kupokea vifaa hivyo.

Baada ya mkurugenzi kutoweka, mbunge huyo alilazimika kutelekeza vifaa hivyo kituoni hapo na kwenda Zahanati ya Kashai ambako Kaimu Msimamizi wa zahanati hiyo, Emmanel Luviga alikubali kuvipokea.

Katika Kituo cha Afya Rwamishenye vifaa hivyo vilipokewa na wauguzi waliogoma kuzungumza suala lolote.

Baada ya kufika Zahanati ya Kagemu, Msimamizi wake Glory Sailo aligoma kupokea vifaa kwa ajili ya mama wajawazito kwa madai ni maelekezo ya viongozi.

Hatua ya viongozi kuweka vikwazo kwenye upokeaji wa vifaa hivyo vyenye thamani ya zaidi ya Sh3 milioni ililalamikiwa na Lwakatare aliyedai aliandika barua manispaa na kutoa nakala hadi ngazi ya mkoa, lakini Mganga Mkuu wa manispaa hiyo, Dk Hamza Mgula alisema hajui lolote kuhusu suala hilo.

Akizungumzia suala hilo, Mihayo alisema kwa kawaida vifaa vya tiba ni lazima vikaguliwe na mganga mkuu wa manispaa ili kuthibitisha ubora, hivyo haviwezi kupelekwa bila kuthibitishwa.

CHANZO: MWANANCHI

Kampuni ya Tigo yatoa Misaada kituo cha kulelea Watoto Yatima cha Mugeza Mseto Manispaa ya Bukoba‏

Mkurugenzi wa Tigo Kanda ya Ziwa, Ali Maswanya akikabidhi misaada mbalimbali Mwenyekiti wa kamati ya shule ya kulelea watoto Yatima cha Mugeza Mseto Manispaa ya Bukoba Bi. Evelyne Mwijage juzi. Kampuni ya Tigo ilitoa misaada kwenye kituo hicho

Mkurugenzi wa Tigo Kanda ya Ziwa, Ali Maswanya akikabidhi misaada mbalimbali Mwenyekiti wa kamati ya shule ya kulelea watoto Yatima cha Mugeza Mseto Manispaa ya Bukoba Bi. Evelyne Mwijage juzi. Kampuni ya Tigo ilitoa misaada kwenye kituo hicho

Mkurugenzi wa Tigo Kanda ya Ziwa, Ali Maswanya akiongea na wanahabari,viongozi  na watoto wa kituo cha kulelea watoto Yatima cha Mugeza Mseto Manispaa ya Bukoba.

Meneja wa Mauzo Mkoa wa Kagera, Sadoki Phares akiongea na wanahabari, viongozi na  watoto wa kituo cha kulelea watoto Yatima cha Mugeza Mseto Manispaa ya Bukoba.

Meneja wa Huduma kwa Wateja wa Tigo Kanda ya Ziwa, Beatrice Kinabo(kushoto) na Meneja wa Duka la Tigo Bukuba, Lilian Mwise (aliyebeba mtoto).

Watoto wa Kituo cha kulelea watoto cha Mugeza Mseto Manispaa ya Bukoba wakifuatilia kwa makini.

Mkurugenzi wa Tigo Kanda ya Ziwa, Ali Maswanya akitembea na watoto wa kituo cha Mugeza mara baada ya kukabidhi misaada.A

Watoto wa Kituo cha kulelea watoto cha Mugeza Mseto Manispaa ya Bukoba wakifuatilia kwa makini.