CAG amaliza kumkagua meya Bukoba

HATIMAYE Mdhibiti na Mkaguzi Mkuu wa Hesabu za Serikali (CAG), Ludovick Utouh, amekamilisha kazi ya siku 35 ya ukaguzi wa tuhuma za ufisadi wa miradi zinazomkabili Meya wa Manispaa ya Bukoba, Anatory Amani. Akizungumza na Tanzania Daima jana mjini Bagamoyo, mkoani Pwani, Utouh alisema katika ukaguzi huo wameweza kuwahoji wahusika wote pasipo kuacha mtu. Utouh alisema kuwa wanatarajia kuweka hadharani ripoti hiyo baada ya wiki tatu kuanzia sasa. Alisema kuwa wakaguzi watakwenda Bukoba kwa ajili ya kukamilisha hatua za mwisho za ripoti hiyo na baada ya hatua hiyo wataweka hadharani suala hilo. “Hadi sasa kazi imeshakamilika na tuliwahoji wahusika wote, hivi sasa tupo katika hatua za mwisho za kukamilisha ripoti, hatutakuwa na siri, kila kitu kitawekwa hadharani,” alisema. Timu ya wakaguzi hao ilianza kazi Septemba 30, mwaka huu, huku Utouh akiwaonya viongozi wote wanaotuhumiwa kwa namna moja au nyingine pamoja na watendaji wa manispaa hiyo kujiepusha na vitendo vyenye mwelekeo wa rushwa, akisema vinaweza kuvuruga mwenendo mzima wa ukaguzi huo. Kamati hiyo ilifanya kazi kwa kuegemea hadidu 14 za rejea huku wakijikita katika maeneo husika kwa mwaka wa fedha 2010/11 hadi 2012/13. Kwa mujibu wa Utouh, hadidu hizo ni kuchunguza usahihi wa utaratibu uliotumika kumpata mwekezaji wa kituo cha kuoshea magari, yaani Kampuni ya ACE Chemicals Ltd, kuchunguza uhalali wa nyaraka na kiasi kilichowekezwa cha sh milioni 297 kwenye mradi huo. Nyingine ni kuchunguza tatizo na sababu zilizosababisha viwanja 800 kutogawiwa kwa wananchi waliochangia gharama za upimaji, mradi wa upimaji wa viwanja 5,000, mradi wa ujenzi wa soko na mradi wa kujenga kitegauchumi. Aliongeza kuwa nyingine ni mradi wa ujenzi wa kituo cha mabasi, ujenzi wa chuo cha ualimu, kituo cha maarifa na ujenzi wa bwawa kwa ajili ya utalii. Yalikuwepo pia masuala mengine ya matumizi ya fedha yanayoashiria ubadhirifu na wizi au ufujaji wa mali za halmashauri na kutoa ushauri kwa serikali kuhusu namna bora ya kuimarisha usimamizi wa mapato katika halmashauri hiyo. Ukaguzi huo pia umegusa mradi wa maji wa Benki ya Dunia kwa ajili ya Kata ya Nyanga, kiwanja cha Shule ya Msingi Kiteyagwa, barabara ya kupitia Kagondo Kaifu hadi Kagondo Karagulu, ujenzi wa Soko Kuu la Manispaa ya Bukoba na Ilani ya Uchaguzi. Chimbuko la mgogoro huo ni madiwani kumlalamikia meya wao kuwa ameiingiza manispaa katika ufisadi kwenye miradi kadhaa. Miradi hiyo ni upimaji wa viwanja 5,000 unaodaiwa mkopo wake wa sh bilioni 2.9 kutoka Mfuko wa Dhamana ya Uwekezaji (UTT) haukufuata taratibu na wananchi hawakushirikishwa ipasavyo. Tuhuma nyingine ni mradi wa ujenzi wa soko. Meya anadaiwa kusitisha malipo ya ushuru na kutaka kuwaondoa wafanyabiashara bila kufuata utaratibu. Anatuhumiwa pia kukopa sh milioni 200 kutoka Benki ya Uwekezaji (TIB) bila kibali cha Baraza la Madiwani. Vilevile alitoa taarifa kwenye kikao cha baraza hilo kuwa TIB iliwapa ruzuku ya sh milioni 90, lakini hakueleza misingi yake. Upo pia mradi wa kuosha magari ambao unadaiwa kutumia kiasi cha sh milioni 297 zinazotiliwa shaka. Ameshindwa pia kutoa mchanganuo wa mapato na matumizi ya mradi wa kiasi cha sh milioni 134 za ujenzi wa kituo cha mabasi. Chanzo;Tanzania Daima

KAGERA YAKUSANYA MIL35 KILA MWEZI SOKO LA SAMAKI

SERIKALI mkoani Kagera inakusanya kati ya shilingi milioni 35 hadi 38 kila mwezi, kutokana na uuzwaji nje ya nchi samaki na dagaa waliokaushwa, wanaovuliwa katika ziwa Victoria

Afisa mfawidhi kitengo cha udhibiti ubora na usalama wa samaki na mazao yake katika mkoa wa Kagera, Monica Kishe amesema kuwa kwa mwezi Oktoba mwaka huu, ziliuzwa nje ya nchi tani 100 za samaki na tani kumi za dagaa wakavu na kuipatia serikali fedha za kigeni zaidi ya shilingi milioni 38.

Amezitaka halmashauri za wilaya ya Bukoba, Muleba na manispaa ya Bukoba, kushirikiana na wavuvi katika wilaya hizo kutunza mialo saba inayokarabatiwa na serikali kuu kwa gharama ya shilingi bilioni 28, ili kuongeza ubora na upatikanaji zaidi wa samaki.

Mialo iliyokarabatiwa ni Nyamukazi,  Igabilo, Rushara, Marehe, Kerebe, Iramba na Katembe, na kuwa gharama ya kila mwalo ni shilingi milioni 400.

Hata hivyo amesema pamoja na mapato hayo samaki katika ziwa Victoria wanaendelea kupungua kutokana na uvuvi haramu unaoendeshwa na baadhi ya wavuvi, ikiwamo kuvua kwa sumu, matumizi ya nyavu zisizoruhusiwa kisheria na vyandarua.

DC Misenyi adaiwa kuhujumu Hifadhi ya Taifa Minziro

B-pepe

Chapa

Mkuu wa Wilaya ya Misenyi mkoani Kagera, Kanali Mstaafu Issa Njiku

Mkuu wa Wilaya ya Misenyi mkoani Kagera, Kanali Mstaafu Issa Njiku na afisa maliasili Jamesi Matekere wanadaiwa kuhujumu Hifadhi ya Taifa ya Msitu wa Asili wa Minziro kwa kuruhusu tani zaidi ya 200,000 kuvunwa kwa kutoa vibali kwa wafanyabiashara isivyo halali.

Vijiji vilivyonufaika na vibali hivyo kwa kisingizio cha kujenga makanisa, vituo vya polisi, mahakama, matanki ya maji ni pamoja na kijiji cha Minziro, Nyakahanga, Kalagala, Kigazi, Kiwelu ambapo kila mfanyabiashara alitakiwa kutoa Sh. 200,000 za kutuma maombi bila kutolewa risiti.

Akiongea na NIPASHE, Mwalimu mkuu wa Shule ya Msingi Minziro, Mkama  Waswa, alisema ana kibali na. KGR/C.4/26/120 cha  22/01/2013 na kuwa walipofika wanajeshi, polisi na jamaa wa usalama wa taifa katika operesheni tokomeza ujangili walidai kibali hicho ni feki na kuwa endapo watampeleka mahakamani ataomba mkuu huyo wa wilaya aunganishwe katika kesi yake na afisa maliasili.

Akiongea na NIPASHE kwa niaba ya Katibu Mkuu wa Wizara ya Maliasili na Utalii, msemaji wa wizara hiyo, Rumisha Chikamdi alisema ni makosa kutoa vibali katika hifadhi ya Minziro na kuwa wanaangalia uwezekano wa kuzuia vibali hivyo.

Kwa mujibu wa kibali cha serikali cha 22/01/2013 kumb. na. KGR/C.4/120 na kibali na. KGR/C.4/26/121 cha  25/01/2013, wakuu hao wameruhusu kupasuliwa mbao ndani ya hifadhi hiyo aina ya afrocarpus dawei (Podo), mimusups bagshawei na beilshrmedia ganaensis.

Wakiongea na NIPASHE kwa nyakati tofauti mkuu huyo wa wilaya, Njiku na Matekere wamekiri kutoa vibali vya uvunaji ndani ya msitu huo kwa maelezo kuwa sheria za misitu zinawalinda kwa kuwa mkuu wa wilaya hiyo ni Mwenyekiti wa kamati ya uvunaji. 

Uchunguzi umebaini kuwa baadhi ya viongozi wa serikali wilayani Misenyi kutoka Idara mbalimbali za serikali wakiwamo polisi na maliasili ndiyo wenye vijana wa kupasua mbao katika hifadhi hiyo ambapo huwalinda kuhakikisha wako salama muda wote.

Mbao za msitu huo huuzwa Bukoba na nchini Uganda ambapo maafisa maliasili huzigonga nyundo kuonyesha kuwa serikali imepokea kodi jambo ambalo siyo sahihi.

Kama alivyoeleza Mtendaji wa serikali ya kijiji cha Misenyi, Eliud Tibaijuka na Mwenyekiti wake, Bonifasi Lugemo, licha ya kuwa na vibali vingi katika kijiji chao hawajawahi kulipa ushuru wa kijiji, halmashauri na serikali kuu kama sheria za misitu zilivyoelekeza ili kibali kiweze kuwa halali.
 

CHANZO: NIPASHE

Operesheni Kimbunga yatumika kutapeli

WANANCHI wa maeneo mbalimbali ya Wilaya ya Bukoba vijijini mkoani Kagera wamekumbwa na taharuki kubwa baada ya askari mgambo kujifanya maofisa wa Operesheni Kimbunga awamu ya tatu, huku wakijitambulisha kama maofisa Usalama wa Taifa na Mamlaka ya Mapato Tanzania (TRA).

Kwa mujibu wa taarifa zilizolifikia gazeti hili, mgambo hao walifika katika maeneo mbalimbali ya Tarafa ya Rubale wakiwa wamevalia sare za Jeshi la Wananchi wa Tanzania (JWTZ).

Akizungumza na Tanzania Daima, Shaban Buruan ambaye ni mmiliki wa duka la bidhaa mbalimbali, alisema akiwa dukani kwake lilifika kundi la watu, wengine wakiwa wamevalia sare za JWT na wengine kiraia, wakamueleza kuwa ni maofisa wa Operesheni Kimbunga awamu ya tatu, wakiongozana na mtendaji wa Kijiji cha Kihumulo, Gidius Alfred.

Buruan alisema baada ya kujitambulisha, walimuomba leseni ya biashara huku wale waliokuwa wamevalia kiraia wakijitambulisha kama maofisa wa TRA.

Alisema kuwa hakuwapa leseni hiyo kwa vile hakuwa nayo mahala hapo, na hivyo wakamtaka awape fedha sh laki moja, jambo ambalo hakuliafiki badala yake akaomba muda awaletee, lakini waliondoka.

Naye Clementina Kakooza ambaye ni raia wa Rwanda aliyeolewa Tanzania, alisema mgambo hao walifika kwake wakiwa na sare za JWTZ wakiongozana na mtendaji wa kijiji na kumtaka awaonyeshe vibali vyake vya kuishi nchini la sivyo watamfikisha polisi.

“Waliponitishia hivyo niliwaeleza kuwa nimebaki kutokana na agizo la serikali kuwa watu tulioolewa na Watanzania tubaki wakati tukifanya utaratibu wa kupata vibali, walikataa na kusema kuwa niwapatie kiasi cha sh 500,000 ambacho sikuwa nacho.

“Nikataka niwape ng’ombe wawili na mbuzi mmoja wakagoma na kulazimisha niwapatie fedha, hapo ndipo tuliposhituka na kupiga simu polisi Rubale,” alisema. 

Kamanda wa Polisi Mkoa wa Kagera, Philip Kalangi alithibitisha kutokea kwa tukio hilo Oktoba 26 mwaka huu, katika Kijiji cha Kihumulo, Tarafa ya Rubale, Halmashauri ya Bukoba.

Alisema kuwa baada ya Operesheni Kimbunga awamu ya pili kitaifa kumalizika, walikabidhi majukumu yote kwa kamati ya ulinzi na usalama za vitongoji, kata, wilaya na mkoa kuendelea na taratibu za kubaini wahalifu wa makosa mbalimbali.

Kalangi alisema wakiwa katika maeneo mbalimbali ya kutekeleza majukumu ya kikazi, walipata taarifa kuwa kuna mgambo walionekana wakifanya kazi ya kukamata watu na kuwahoji, hususani wahamiaji haramu. Walifika eneo la tukio na kufanikiwa kuwakamata mgambo watatu.

Aliwataja waliowakamatwa kuwa ni Amran Sadick, Abeid Amada na Mathias Sospeter ambao ni mgambo wa Manispaa ya Bukoba na Ofisa Mtendaji wa Kijiji cha Kihumulo, Gidius Alfred.

Alisema mtendaji huyo alikamatwa kwa kosa la kushirikiana na mgambo hao kufanya kazi bila kushirikiana na uongozi wa kata na wilaya.

Kwa mujibu wa Kalangi, walipofikishwa polisi na kuhojiwa hawakuwa na la kujitetea zaidi ya kuomba msamaha.

Alisema watuhumiwa wote wamefikishwa mahakamani kwa kosa la kudai fedha kwa njia ya vitisho na uchunguzi unaendelea ili kuendelea kubaini makosa yao mengine kwa ajili ya kuwasilisha ushahidi mahakamani.

Hata hivyo, alifafanua kuwa wakati watuhumiwa hao wanakamatwa, hawakuwa na sare za jeshi lolote na kwamba uchunguzi bado unaendelea.

Chanzo: Tanzania Daima

Muleba waahidiwa watalaamu wa upimaji ardhi

Wananchi Wilaya ya Muleba Mkoa Kagera wamehaidiwa kuletewa wataalamu wa kupima ardhi ili kutenganisha maeneo ya wakulima na wafugaji.

Ahadi hiyo imetolewa jana na Waziri wa Ardhi,Nyumba na Maendeleo ya Makazi Profesa Anna Tibaijuka wakati akihutubia wananchi wa Kata ya Kabilizi iliyoko Wilaya ya Muleba.

Profesa Tibaijuka ambaye pia ni Mbunge wa Jimbo Muleba Kusini amesema ili kuondoa tatizo la wakulima na wafugaji hakuna budi kuwapimia ili kila kundi litambue maeneo yake bila kuingiliana.

Amesema wafugaji wamekuwa na tatizo la kuwacha mifugo yao iharibu mazao ya wakulima na amemwagiza Mkuu wa Wilaya kuwa mifugo ikikamatwa ndani ya shamba la mtu aishughulikie mara moja..

Kata hiyo ya Kabilizi imekuwa na mgogoro baina ya Wakulima na Wafugaji kwa muda mrefu na hivi sasa kumekuwepo na ufumbuzi baada ya Waziri kutatua tatizo hilo..

BALOZI WA JAPAN ARIDHISHWA NA UJENZI WA DARAJA LINALOUNGANISHA TANZANIA NA RWANDA

  Balozi wa Japan Mheshimiwa Masaki Okada (wa kwanza kushoto) akiwa na Waziri wa Ujenzi Mheshimiwa Dkt. John Pombe Magufuli (nyuma ya Balozi) pamoja na Afisa Mtendaji Mkuu wa Wakala wa Maendeleo ya Usafirishaji nchini Rwanda Bw. Guy Kalisa (mwenye tai nyekundu) wakikagua eneo la kituo cha pamoja cha ukusanyaji ushuru kwa upande wa Rwanda.

 Balozi wa Japan Mheshimiwa Masaki Okada (wa pili) akiwa na Waziri wa Ujenzi Mheshimiwa Dkt. John Pombe Magufuli (nyuma) pamoja na Afisa Mtendaji Mkuu wa Wakala wa Maendeleo ya Usafirishaji nchini Rwanda Bw. Guy Kalisa (wa pili kutoka nyuma) wakikagua eneo la kituo cha pamoja cha ukusanyaji ushuru kwa upande wa Rwanda.

 Injinia Hitoshi Kameda (kushoto) akitoa maelezo kwa Balozi wa Japan Mheshimiwa Masaki Okada (wa pili kushoto) akiwa na Waziri wa Ujenzi Mheshimiwa Dkt. John Pombe Magufuli (wa pili kulia) pamoja na Afisa Mtendaji Mkuu wa Wakala wa Maendeleo ya Usafirishaji nchini Rwanda Bw. Guy Kalisa (kulia) wakikagua eneo la ujenzi wa daraka la Rusumo kwa upande wa Rwanda.

Maporomoko ya Rusumo katika Mto Kagera linapojengwa draja la kuziunganisha nchi za Tanzania na Rwanda katika wilaya ya Ngara mkoani Kagera.

Magari yakipita katika daraja la zamani (kulia) ambalo linatumika hadi sasa na kushoto ni ujenzi wa daraja jipya ukiendelea katika Mto Kagera eneo la Rusumo

******

Balozi wa Japan nchini Tanzania Mheshimiwa Masaki Okada ameelezea kuridhishwa na utekelezaji wa mradi ujenzi wa daraja la kimataifa la Rusumo na kituo cha pamoja cha ukusanyaji ushuru katika eneo la Rusumo mpakani wa Tanzania na Rwanda. 

Miradi hiyo miwili mikubwa inayofadhiliwa na Serikali ya Japan ilianza kujengwa mwezi Machi mwaka huu wa 2013 na imepangwa kukamilika mwezi Novemba mwaka 2014. 

 “Nimeridhishwa na viwango na kasi ya utekelezaji wa mradi huu” alisema Balozi Okada wakati alipotembelea eneo hilo la mpakani mwa Tanzania na Rwanda ambapo alisisitiza kuwa, inatia moyo kuona fedha zilizotolewa na nchi yake zikitumika vizuri kwa lengo la kukamilisha miradi hiyo kwa wakati. 

 Naye Meneja wa Tanroads wa Mkoa wa Kagera Injinia John Kalupale akitoa taarifa kwa Balozi huyo wa Japan ambaye alifuatana na Waziri wa Ujenzi Mheshimiwa Dkt. John Pombe Magufuli, alielezea kuwa uamuzi wa kujenga daraja jingine katika eneo hilo la mpakani, unatokana na mahitaji halisi ya wakati huu kwani daraja linalotumika hivi sasa lilijengwa miaka 40 iliyopita likiwa na uwezo wa kubeba tani 32. 

Aliendelea kueleza kuwa ingawa miaka ishirini baada ya ujenzi wa daraja hilo kulifanyika ukarabati mkubwa kwa lengo la kuimarisha uwezo wake, bado kumeendelea kuwepo kwa ongezeko kubwa la magari hasa yanayosafirisha bidhaa kati ya Bandari ya Dar es Salaam na nchini jirani ya Rwanda. Injinia Hitoshi Kamega ambaye ni Mhandisi Mkazi wa Kampuni mbili zilizoungana kuusimamia mradi huo ambazo ni Chodei Co. Ltd. na Nippon Koei Co, amelezea kuwa ujenzi wa daraja hilo la Rusumo lenye urefu meta 80 pamoja na kituo cha ushuru, unatekelezwa na Mkandarasi Daiho Co. kutoka Japan kwa gharama ya Shilingi bilioni 31.736. 

 Waziri wa Ujenzi Mheshimiwa Dkt. John Pombe Magufuli hata hivyo alibainisha kujitokeza kwa mapungufu katika baadhi ya maeneo ya mradi huo ambayo wizara yake kwa kushirikiana na Ubalozi wa Japan hapa nchini wanayafanyiakazi ili kuhakikisha kuwa kunakuwepo na uwiano mzuri wakati wa utekelezaji wa mradi huo na pale huduma zenyewe zitakapoanza kutolewa.. Waziri Magufuli aliyataja baadhi ya mapungufu hayo kuwa ni pamoja na kutotengwa kwa eneo la kutosha la maegesho ya magari kwa upande wa Tanzania na kuhitajika kwa upanuzi wa majengo ya huduma za kiutawala hasa wakati wa kutekeleza mipango ya baadaye kwa kuzingatia ongezeko la shughuli za kibiashara linavyoonekana katika eneo hilo.

PICHA NA MICHUZI BLOG

   

PI

Breaking News: ajali mbaya imetokea eneo la Migela Mjini Bukoba, watu wahofiwa kupoteza maisha

Ajali mbaya muda imetokea muda huu eneo la Migela Mjini Bukoba,uwenda watu wakapoteza maisha kufuatia zoezi la uokoaji linaloendelea kwa kusuasua.  Endelea kufuatilia.


Picha kwa hisani ya Mdau Mc Baraka Galiatano

WACHEZAJI WA YANGA WATUA SALAMA MJINI BUKOBA, TAYARI KWA MPAMBAO NA KAGERA SUGAR JUMAMOSI HII.

Mapema Asubuhi hii Ndege ya Precision Air ikiingia kwenye uwanja wa Ndege wa Bukoba, kuwaleta wachezaji wa Yanga ambao wanatarajia kucheza mchezo wao na Wenyeji Kagera Sugar kesho kutwa Jumamosi.

Wachezaji wa Yanga wakishuka, mbele ni Mbuyu Twite wakishuka uwanja wa Ndege Bukoba

Nizar Khalfani nae yupo kwenye kikosi

Wachezaji wakiendelea kushuka kwenye ndege

Tayari wamekanyaga Ardhi ya Bukoba

Kama kawaida: kushoto ni Khalfan Ngassa kulia ni Niyonzima

Picha ya Pamoja Viongozi na wachezaji

chanzo Vijimambo Blog

OPERESHENI KIMBUNGA AWAMU YA PILI SASA KUHAMIA MIKOA YA KAGERA, KIGOMA NA GEITA

JAMHURI YA MUUNGANO WA TANZANIA

WIZARA YA MAMBO YA NDANI YA NCHI

Awamu ya Pili ya Operesheni Kimbunga imeweza kukamata majambazi ya kutumia silaha 67 na wahamiaji haramu 134  katika kipindi cha wiki moja tangu  kuanza kwake Septemba 21hadi Septemba 27 mwaka huu katika mikoa ya Kagera, Kigoma na Geita.

Silaha zilizokamatwa ni pamoja na bunduki aina ya SMG Moja, Pistol Moja na Magobole 17 pamoja na risasi 115 zikiwemo za bunduki aina ya SMG 102 na Risasi za Pistol 13. Aidha, Magazine mbili zilikamatwa pamoja na Sare za Jeshi la Burundi.

Wahamiaji haramu waliokamatwa wengi wao ni kutoka nchi za Burundi ambapo raia wake 114 walikamatwa wakiishi nchini kinyume na sheria wakati raia wa Rwanda 20 walikamatwa katika kipindi hicho.

Aidha, watu Watatu walikamatwa kwa tuhuma za kuhifadhi wahamiaji haramu nchini huku Lita 271 za gongo , ngozi ya Mbwea, Bangi kilo Tatu na Makokoro 12 vilikamatwa wakati wa operesheni Kimbunga awamu ya Pili ikiwa katika wiki yake ya kwanza.  

Wakati huo huo, Wilaya ya Karagwe mkoani Kagera imejipanga kukabiliana na tatizo la wahamiaji haramu ili kuhakikisha kuwa tatizo hilo linafikia mwisho wake na kuwapa nafasi wananchi kufanya shughuli zao za kijamii na kimaendeleo bila ya hofu ya kufanyiwa uhalifu na wahamiaji haramu.

Mkuu wa Wilaya ya Karagwe Bi Dari Rwegasira amewaambia          Maafisa Tarafa na Watendaji wa Kata aliokutana nao katika Ukumbi wa Halmashauri ya Wilaya ya Karagwe, mwishoni mwa wiki iiliyopita kuwa kuanzia sasa kila kiongozi, kuanzia ngazi ya Kiijiji/Mtaa, Kata, Tarafa na Wilaya, atawajibika kwa jinsi anavyoshughulikia kumaliza tatizo la wahamiaji haramu katika eneo lake.

Wilaya ya Karagwe ni moja ya wilaya zenye tatizo sugu la wahamiaji haramu ambao wanatuhumiwa kuwanyanyasa wananchi katika baadhi ya maeneo ya Wilaya hiyo, kwa kuendesha vitendo vya wizi wa mifugo, kuvamia maeneo ya kilimo, na pia kuchochea uhalifu wa unyang’anyi wa kutumia silaha na kusababisha mauaji.

Wahamiaji hao haramu wanashutumiwa kufanya baadhi ya maeneo ya Wilaya ya Karagwe yasipitike kwa urahisi, mojawapo ikiwa ni eneo la msitu wa Kimisi, ambapo eneo hili limekuwa na matukio mengi ya ujambazi wa kutumia silaha na wananchi kuvamiwa na kuibiwa mali zao na hata wengine wakipoteza maisha katika matukio hayo.

Maazimio kadhaa yalitolewa katika kikao hicho kati ya Mkuu wa Wilaya ya Karagwe na Watendaji Wakuu wa Wilaya hiyo, ikiwa ni pamoja na kuwa:

·         Viongozi kuanzia ngazi ya Kijiji/Kitongoji, Kata hadi Tarafa kutia saini mkataba wa kushughulikia wahamiaji haramu, majambazi wa kutumia silaha na wafadhili wao, mifugo haramu inayoingia nchini kutoka nchi jirani pamoja na vitendo vyote vya uhalifu katika maeneo wanayoyaongoza.

·         Kiongozi yoyote wa Kijiji, Kata au Tarafa atakayeshindwa kushughulikia wahamiaji haramu walioko katika eneo lake atawajibishwa.

·         Wahamiaji wote haramu ambao bado wapo katika maeneo mbalimbali ya wilaya hiyo wasakwe na kurejeshwa kwao mara moja.

·         Msako uanzishwe mara moja kuwasaka wahamiaji haramu wote ambao wamejificha katika maeneo ya misitu na ranchi za mifugo zilizoko katika wilaya hiyo kwa kuvishirikisha vyombo vyote vya Utawala na vya Ulinzi na Usalama vilivyoko katika Wilaya hiyo.

·         Kila kijiji kiwe na takwimu sahihi za wageni waliopo katika maeneo yao.

·         Wahamiaji haramu wote wanaorejeshwa kwao wasipewe nafasi ya kurudi tena nchini na mwananchi yoyote atakayebainika kuwapokea au kuwasaidia kurejea  atolewe taarifa haraka ili hatua za kisheria zichukuliwe dhidi yake.

·         Vibali vyote vya Ukazi vilivyotolewa kwa wageni mbalimbali sasa vitakaguliwa upya ili kuhakiki uhalali wake.

Imeandaliwa na: 

Timu ya Habari ya Operesheni Kimbunga

Septemba30,2013

Madereva wakorofi waonywa

MKUU wa Mkoa wa Kagera, Kanali Mstaafu, Fabian Massawe, amewaonya madereva wa vyombo vya moto mkoani hapa kujiepusha na uvunjaji wa sheria za barabarani.

Amesema madereva lazima watii sheria za barabarani bila shuruti, na kwamba serikali haitasita kuwakamata wanaovunja sheria.

Kanali Massawe alitoa onyo hilo juzi wakati wa sherehe za maadhimisho ya wiki ya usalama barabarani, ambayo kimkoa ilifanyika Uwanja wa Kaitaba mjini Bukoba.

Massawe ambaye alikuwa mgeni rasmi katika maadhimisho hayo, ambayo kitaifa yalifanyika jijijni Mwanza, alisema lengo la kuwepo maadhimisho hayo ni kuielimisha jamii juu ya matumizi ya barabara na sheria za nchi.

“Ajali za barabarani zinaathiri sana maisha ya wananchi wetu. Kwa hiyo natoa onyo kwa madereva wote kuzingatia sheria,” alisema.

Alisema jamii kutojua vizuri sheria zikiwemo za barabarani, kimekuwa chanzo kikubwa cha ukiukwaji wa sheria na kutokea ajali ambazo nyingi husababisha vifo.

Aliwaomba watembea kwa miguu na waendesha vyombo vya moto kuwa makini na kuzingatia sheria za barabarani, kani itasaidia kupunguza ajali.

Chanzo: Tanzania Daima

CAG KUKAGUA OFISI YA MEYA BUKOBA

Mdhibiti na Mkaguzi Mkuu wa Hesabu za Serikali (CAG), Bw. Ludovick Utouh, amesema ofisi yake ipo mbioni kwenda mjini Bukoba, mkoani Kagera, ili kufanya ukaguzi wa mahesabu katika Ofisi ya Meya na kutoa ripoti yenye uhakika.

  Bw. Utouh aliyasema hayo Dar es Salaam jana katika mafunzo yaliyoshirikisha Wahariri na waandishi wa vyombo mbalimbali vya habari ili kuwajengea uwezo wa kuripoti taarifa za ofisi hiyo.
  Alisema ukaguzi wanaokwenda kuufanya mjini Bukoba, hautokani na matakwa ya Katibu wa NEC, Itikadi na Uenezi wa Chama Cha Mapinduzi (CCM), Bw. Nape Nnauye; bali ni ombi maalumu lililotolewa na Ofisi ya Waziri Mkuu. 

  Aliongeza kuwa, kumekuwa na taarifa za upotoshaji ambazo zimekuwa zikifanywa na baadhi ya makundi ambayo hayana nia njema na ofisi hiyo, hivyo ni vyema ikaeleweka kuwa, ukaguzi huo umezingatia agizo la Waziri Mkuu. 

 "Ofisi yangu inafanya kazi kikatiba si kwa matakwa ya chama chochote cha siasa, ukaguzi maalumu ambao utafanyika mjini Bukoba, utaanza wiki ijayo...ni jukumu la vyombo vya habari kuwa waangalifu wanaporipoti taarifa hizi.

"Wananchi wa Bukoba wasiwe na wasiwasi, tunakwenda huko lakini hatutaki chai ya mtu labda usafiri ambao upo kisheria kwa ajili ya ukaguzi wa miradi yenye utata iweze kufikiwa na kupatikana taarifa sahihi," alisema. 

  Bw. Utouh alisema uwajibikaji na uwazi ni mambo yasiyoweza kupatikana katika mfumo wa kuficha taarifa za utekelezaji wa mipango mbalimbali ya Serikali. 

  Alisema mahali ambapo habari inafichwa, lazima patatokea mvutano, kutoaminiana na hatimaye wananchi kuona Serikali yao ndiyo chanzo cha matatizo hivyo ni muhimu haki ya kikatiba kwa wananchi kupashwa habari ikazingatiwa. 

  Alitumia fursa hiyo kuvitaka vyombo vya habari nchini k u p u n g u z a u p o t o s h a j i n a kuelimisha jamii ipasavyo ili kusaidia makundi mbalimbali kuzielewa vizuri ripoti za CAG ili kuzuia machafuko yasiyo na lazima nchini. 

 "Madhara ya kuripoti taarifa za upotoshaji na mipaka ambayo inahitajika ni makubwa kwa jamii ...tunahitaji kufikiria masuala mazito yanayokwamisha kufikia malengo yetu, hivyo ni muhimu kuacha kutoa taarifa zisizo sahihi," alisema 

Chanzo: Majira

Zana haramu 9,000 zateketezwa

SERIKALI kupitia Idara ya Uvuvi mkoani Kagera, imekamata na kuteketeza kwa moto zana haramu 9,809 zilizokuwa zikitumika kwenye uvuvi ndani ya Ziwa Victoria.

Akizungumza na waandishi wa habari mjini Bukoba, Ofisa Mfawidhi wa Uvuvi na Doria Mkoani Kagera, Apolinary Kyojo alisema zana hizo zilikamatwa kutokana na msako maalumu wa kushitukizwa ndani ya Ziwa Victoria.

Alisema msako huo wenye lengo la kupambana na uvuvi haramu ndani ya ziwa hilo ulifanyika kati ya Juni na Agosti mwaka huu.

"Serikali inaendelea kupambana na watu wanaoshiriki uvuvi haramu ndani ya Ziwa Victoria. Kati ya Juni na Agosti mwaka huu, tulikamata zana haramu 9,809. kwenye msako wa kushtukiza,” alisema.

Alizitaja zana zilizokamatwa kuwa ni nyavu zenye matundu madogo zipatazo 7,000, nyavu aina ya timba 2,700, makokoro yenye urefu wa zaidi  ya mita 110,000, vyote vikiwa na thamani ya zaidi ya sh 750,000.

Kwa mujibu wa Kyojo katika kutekeleza misako ya namna hiyo, idara yake inakabiliwa na changamoto ya kukosa ushirikiano kutoka kwa baadhi ya viongozi wa vijiji, kata na hata wasimamizi wa rasiliamali za Ziwa Victoria (BMU).

Chanzo: Tanzania Daima

Wafugaji wauawa kinyama

 WAFUGAJI wawili wameuawa kinyama kwa kukatwa mapanga na kuchomwa mikuki na wananchi, huku ng'ombe wapatao 12 nao wakiuawa katika Kijiji cha Kasulo wilayani Ngara, Mkoa wa Kagera.

Chanzo cha mauaji hayo kinadaiwa kuwa ni uhasama wa muda mrefu kati ya wananchi na wafugaji hao wanaodaiwa kuingiza mifugo kijijini humo bila ridhaa ya serikali ya kijiji.

Tukio hilo lilitokea Septemba 19 mwaka huu, saa 11:00 jioni na kwamba ng'ombe waliouawa kwa kuchomwa mikuki na kukatwa mapanga, nyama zake zilichukuliwa na wanawake kwa ajili ya kitoweo.

Akithibitisha tukio hilo, Mwenyekiti wa Kitongoji cha Ngoma 'B' yalipotokea mauaji hayo, Simeon Nzakaya alilaani kitendo cha wananchi kujichukulia sheria mkononi na kuwataja waliouawa kuwa ni Ngabo Godfrey (24) na mwingine ambaye bado hajatambulika jina lake.

Alisema kuwa miili ya marehemu hao ilipatikana Septemba 20, na watu wanane wanashikiliwa na vyombo vya usalama kwa mahojiano zaidi kuhusiana na mauaji hayo.

Hata hivyo, taarifa zinadai kwamba baadhi ya mamlaka zinazolalamikiwa ni pamoja ni Idara ya Uhamiaji Wilaya, Mifugo na Halmashauri ya Wilaya kupitia kitengo cha sheria kwa kushindwa kuchukua hatua mara baada ya kuombwa kuingilia kati mambo ya uvamizi wa wafugaji.

Naye Mwenyekiti wa Kijiji cha Kasulo, Yusufu Katula alithibitisha kuwepo kwa mauaji hayo pamoja na kulaani kitendo hicho.

"Mgogoro huo unafukuta kutokana na idara husika kutochukua hatua mapema. Hii inachangia kutokea mauaji kama haya, na hatua za haraka zisipochukuliwa yanaweza kutokea mapigano makali kati ya wanakijiji na wafugaji wanaoingia kinyemela,"alisema.

Mkuu wa Wilaya ya Ngara, Costantine Kanyasu alionya kuwa matukio kama hayo hayaruhusiwi kutokea katika jamii, na aliahidi ofisi yake kuyafanyia kazi malalamiko yote yanayotolewa kwa baadhi ya mamlaka.

"Ni kweli baadhi ya mamlaka za serikali zinalalamikiwa sana na wananchi. Na sasa nitakachokifanya ni kuchukua hatua za haraka kuhakikisha tukio kama hilo halitokei tena," alisema.

Chanzo: Tanzania Daima

ABELA KIBIRA: BINTI WA KIHAYA ANAYETIKISA AMERICA KIMUZIKI

Mkoa wa Kagera umebarikiwa kuwa na uwakilishi mzuri katika tasnia mbalimbali ndani na nje ya nchi, akina Rweyemamu wanazidi kupasua anga! mfano mzuri ni Mwanamuziki wa kike Abela ambaye ni mzaliwa wa Bukoba Mkoani Kagera anayepeperusha vyema bendera ya Tanzania kimziki huko Amerika anakoishi na kufanya kazi zake za muziki.

Abela Kibira alizaliwa Septemba 22 mwaka 1989 akiwa mtoto wa kwanza katika familia ya Mtanzania Josiah Kibira mzaliwa wa Bukoba Kagera, Tanzania na Mmarekani, Mrs Josiah Kibira.

Mchanganyiko huo wa tamaduni mbili kwa binti huyo ambaye ana kipaji cha utunzi na uimbaji, umemfanya kujimarisha na kujijengea jina katika muziki kutokana na aina ya muziki na manjonjo anayoyafanya katika mzuiki wake kupendwa.

Abela ni mzaliwa wa Bukoba, Tanzania lakini kwa sasa anaishi Minneapolis, Marekani. Binti huyu anasauti nzuri, ya kipekee na ya kuvutia jambo ambalo nyimbo zake nyingi zimekuwa zikipendwa sana

Onyesho lake la kwanza Binti huyu alilifanya kanisani na ndipo kipaji chache kilipojifunua machoni mwa watu wengi na hivyo kuendelea kuimba katika matamasha mbalimbali shuleni na matamasha maalumu.

Abela amekulia katika mji wa Wayzata, Minnesota na alipendwa kutokana na kuwa na uwezo wa ajabu katika kuimba kwaya na matamasha ya pamoja wakati akiwa katika masomo yake ya sekondari na chuo.

Mwaka 2003 baba yake mzazi Mr. Josiah Kibira alimshirikisha katika filamu yake aliyoiita Bongoland, ambapo Abela alitunga wimbo wa kusindikiza filamu hiyo (soundtrack) jambo lililomuongezea uwezo na umaarufu kwa mashabiki Amerika, Afrika na maeneo mengi ulimwenguni.

Abela ambaye bado binti kigoli anayejitambua amekuwa akiiimba na kujifua utumiaji wa sauti takriban maisha yake yote lakini kwa sasa amejikita zaidi katika utunzi na utengenezaji wa nyimbo za Hip Hop, Reggae na ni mzuri katika aina tofauti tofauti za muziki.

Abela hana shida juu ya kufanya collabo na wasanii wa Kitanzania na Africa kwa ujumla kwa hiyo kama unapenda kumshirikisha kazi ni kwako! Kwa sasa anatamba na video ya wimbo wake alioutoa mwishoni mwa mwaka jana unaoitwa Ball & Chain.

Kabla ya hapo ametamba na nyimbo nyingi zikiwemo Rolling Stone, Someone like you na Hey Ya.
Imeandaliwa na Dotto Kahindi

Operesheni Kimbunga yanasa wahamiaji haramu 1,851

HATIMAYE operesheni ya kuwasaka wahamiaji haramu nchini, iliyopewa jina la Kimbunga, imeanza juzi huku watu 1,851 wakikamatwa. Hatua hiyo, imetokana na agizo la Rais Jakaya Kikwete la kuwataka watu wanaomiliki silaha na kuishi nchini kinyume cha sheria, kuondoka wenyewe kwa hiari yao kabla vyombo vya dola havijaanza kazi ya kuwasaka.

Operesheni hiyo inayovishirikisha vyombo vyote vya dola, imeanza katika Mikoa ya Geita, Kagera na Kigoma.

Akizungumza na waandishi wa habari, Mkuu wa Mkoa wa Kagera, Kanali mstaafu, Fabian Massawe, alisema hadi jana wahamiaji haramu 1,851 wamekamatwa wakati 11,601 wameondoka kwa hiari yao.

Alisema operesheni hiyo haitamuacha mhamiaji haramu ndani ya mikoa hiyo.

Alisema licha ya wahamiaji 11,601 kuondoka wenyewe, Serikali imelenga wahamiaji 52,053 ambao bado wapo katika mikoa hiyo.

Alisema tangu Rais Jakaya Kikwete alipotoa agizo la wahamiaji haramu kuondoka kwa hiari, bunduki 65 zikiwamo Sub Machine Gun (SMG) tatu, ShortGun 10 na magobole 52 zilisalimishwa.

Naye, Mkuu wa Operesheni Msaidizi wa Jeshi la Polisi, Simon Sirro, alisema vyombo vyote vya dola vinaendelea na kazi ya kuwasaka wahamiaji.

Aliwatahadharisha wananchi mkoani Kagera kujihadhari na kuuziwa mali yoyote kutoka kwa mtu yeyote anayehamishwa bila maandishi kwa ajili ya kuepuka kukamatwa na kuhusishwa kushirikiana na wahamiaji hao.

Alisema walikamata ng’ombe 1,765, sare na vifaa mbalimbali vya Jeshi la Wananchi wa Tanzania (JWTZ).