Kagera Yetu

ASKOFU KILAINI: TUSIINGIE VITANI NA MALAWI

Na Arodia Peter

ASKOFU wa Kanisa Katoliki Jimbo la Bukoba, Dk. Methodius Kilaini, ameiasa Serikali ya Tanzania kutojaribu kuingia vitani kupigana na Malawi, kutokana na mzozo wa mipaka unaoendelea.

Akizungumza na MTANZANIA jana, Askofu Kilaini alisema njia pekee ambayo inaweza kuleta suluhu ni mazungumzo baina ya pande zote mbili.

“Nimesikia kauli za viongozi wetu, nimeshtuka mno… sipendi kuona taifa letu linaingia kwenye vita wakati huu, wote tunakumbuka mwaka 1978, wakati tulipopigana na Uganda,

….ile vita ilitusababisha Watanzania tufunge mkanda wakati wote, makovu yake bado yanaonekana, namuomba Mungu aepushe jambo hili,” alisema Askofu Kilaini.

Alisema umefika wakati wa Serikali ya Tanzania na Malawi, kukutana kwa ajili ya kutafuta ufumbuzi, kuliko kuendeleza vitisho ambavyo vinaweza kuleta athari kubwa kwa pande zote.

“Nimesikitika kuona viongozi wa Tanzania, wanahamaki kuhusu mgogoro huo…zitumike mbinu za kidiplomasia kufikia muafaka, ili wananchi wa pande zote waendelee na jitihada za kujiondelea umasikini unaowakabili,” alisema Askofu Kilaini.

Alisema pamoja na kushauri pande hizo, zikutane aliitaka Tanzania kutokubali kunyang’anywa ardhi inayomiliki kihalali.

“Viongozi wetu naona wanatoa matamko kila siku, wenzao wamekaa kimya, jambo ambalo linapaswa kuchukuliwa kwa tahadhari kubwa.

“Tukumbuke kauli aliyowahi kuitoa Rais wa zamani wa Malawi, Kamuzu Banda, kwamba Watanzania ni mabingwa wa maneno, lakini Wamalawi ni watu wa vitendo.

“Hatutaki kugombana, twende katika mazungumzo, tutumie njia za kidiplomasia kutatua mgogoro huu, lakini Tanzania isibweteke kwa ukimya wa Malawi,” alisema Askofu Kilaini.

Mgogoro wa Tanzania na Malawi ni wa siku nyingi na chanzo chake ni mpaka ndani ya Ziwa Nyasa.

Kwa muda sasa, Malawi inadai eneo lote kaskazini ya Msumbiji kuelekea mikoa ya Ruvuma na Mbeya ni mali yao, hii ni kwa mujibu wa mkataba wa Heligoland uliosainiwa Julai, 1890.

Lakini Tanzania kwa upande wake, inadai mpaka kati ya nchi hizo, unapita katikati ya ziwa hilo, usawa wa nyuzi 11 Kusini hadi mwisho wa ziwa katika eneo la Kyera.

Tanzania inadai nyaraka za ramani zilizotengenezwa na wakoloni Waingereza mwaka 1928, 1937 na 1939, zote zinaonyesha mpaka wa ziwa hilo upo katikati ya Ziwa Nyasa.

Juzi Mwenyekiti wa Kamati ya Bunge ya Mambo ya Nje, Ulinzi na Usalama, Edward Lowassa aliwaambia waandishi wa habari kuwa Jeshi la Wananchi wa Tanzania (JWTZ), liko tayari kukabiliana na tishio lolote kwa ajili ya kuwalinda Watanzania pamoja na mipaka yake.

Chanzo: Mtanzania

KAMATI YA SENSA YAPITISHA WASIMAMIZI 1,388

na Mbeki Mbeki, Karagwe

KAMATI ya Sensa wilayani Karagwe mkoani hapa, imepitisha majina 1,388 yatakayohusika na zoezi la sensa ya watu na makazi itakayofanyika Agosti 26.

Hayo yalisemwa jana na mratibu wa sensa wilayani Karagwe, Moris Mulilo katika kikao cha kupokea majina ya makarani wa sensa kilichofanyika ofisini kwa mkuu wa wilaya.

Mulilo aliyasoma majina ya makarani hao kwa Kamati ya Sensa ambapo iliyathibitisha na kukubaliana na utaratibu uliotumika wa kila mshiriki kutuma maombi na kwa kuzingatia sifa zao.

Alisema kuwa, makarani wa dodoso fupi ni 803, dodoso refu ni 460, wasimamizi ni 103 na 22 watakuwa ni makarani wa tahadhari ambapo aliongeza kuwa semina yao itaanza rasmi leo.

Mratibu huyo alisema, ili kurahisisha kazi ya kuhesabu watu, wilaya yake imetengwa katika maeneo madogo madogo katika mfumo wa taarifa za kijiografia na kuwa kila eneo lililotengwa limechorwa ramani inayoonesha mahali lilipo pamoja na mipaka yake.

Aliongeza kuwa, utengaji wa maeneo ya kuhesabia watu, umefanywa katika eneo la wilaya ikiwa ni pamoja na maeneo ya makazi ya watu, visiwa, misitu, mbuga za wanyama na maeneo ya wafugaji.

Aliyataja baadhi ya maeneo ambayo viongozi wake wanapaswa kuhamasisha watu wao kushiriki zoezi hilo, ni Kafunjo, Bitaraka, Kahundwe, Nyakasimbi, Bigoro, Rushosho na Omukakanja kutokana na jiografia ya maeneo husika.

Kwa upande wake Mkuu wa Wilaya, Darry Rwegasira alisema kuwa uhamasishaji wa wananchi na wadau wengine kushiriki katika kufanikisha sensa, umeanza muda mrefu katika wilaya yake, na kuongeza kuwa kadiri muda unavyokaribia, ndivyo shughuli za uhamasishaji zinavyoimarishwa.

Rwegasira ambaye pia ni mwenyekiti wa Kamati ya Sensa Wilaya, alisema kamati hiyo ina jukumu la kusimamia zoezi hilo katika maeneo yao, kutoa ushauri wa utekelezaji na kuandaa umma kwa kuwaelimisha wananchi pamoja na matarajio ya ushiriki wao katika zoezi hilo muhimu kitaifa.

Aidha, alisema kuwa sensa ya watu na makazi ya mwaka 2012 inafanyika kwa mujibu wa sheria ya takwimu Na. 1 ya mwaka 2002, ambapo kutokana na sheria hiyo, taarifa zote binafsi za watu zitakazokusanywa wakati wa zoezi hilo ni siri na zitatumika kwa madhumuni ya kitakwimu.

Hata hivyo, watu wote watakaohusika na kazi ya kuhesabu watu, watalazimika kula kiapo cha kutunza siri ya taarifa binafsi za watu watakaowahesabu kabla ya kuanza kazi hiyo.

Chanzo: Tanzania Daima

RUTORO WALIA NA WAZIRI TIBAIJUKA

na Ashura Jumapili, Muleba

WANANCHI wa Kata ya Rutoro jimbo la Muleba Kaskazini mkoani Kagera, wamesema matatizo ya ardhi yanayowakumba yanasababishwa na siasa za Chama cha Mapinduzi (CCM).

Kauli hiyo ilitolewa kwa nyakati tofauti na wananchi hao walipokuwa wakizungumza na Tanzania Daima juzi, juu ya migogoro inayotokea mara kwa mara eneo hilo kati ya wakulima na wafugaji.

Walibainisha, kwa muda wa miaka saba wakulima na wafugaji wamekuwa na ugomvi, lakini hivi karibuni Waziri wa Ardhi, Nyumba na Maendeleo ya makazi Profesa Anna Tibaijuka alisema ameumaliza mgogoro huo.

Waliongeza kuwa Waziri Tibaijuka aliwataka wakulima waendelee kulima bila kutoa uthibitisho wa kumaliza mgogoro huo.

Bartazari Kihanga, mkazi wa Kitongoji cha Rwamtukuza kijiji Buyeke, kata ya Rutoro, alisema hajui njia iliyotumiwa na Waziri Tibaijuka kumaliza mgogoro huo uliodumu kwa muda wa miaka saba ikihusisha wafugaji na wakulima.

Kihanga alisema katika kikao cha waziri huyo na wanachi hao, hakueleza wenye haki ya kumiliki eneo linalogombewa ni kina nani baina ya wakulima na wafugaji ambao ni Wanyarwanda wenye uraia wa Tanzania waliovamia eneo hilo mwaka 2006 na kujiita wawekezaji.

Francis Tibahika mkazi wa kitongoji Charutale, alisema maneno ya waziri ni siasa za Chama cha Mapinduzi kama ameumaliza mgogoro huu angetuachia kibali kwani yeye ni waziri anayehusika na mgogoro huu kwa maana ya wizara yake.

Alisema, baada ya Waziri Tibaijuka kuondoka wafugaji hao walipeleka ng’ombe kwenye mashamba ya wakulima jambo lililofanya mazao yaliyokuwapo yaharibike sambamba na kuchochea kutoelewana kwa pande hizo mbili.

Athuman Ruhazi alisema wananchi wa kata hiyo wana hali ngumu ya kimaisha kwani mashmba waliyoyategemea kwa ajili ya mazao ya chakula na biashara sasa yamegeuzwa sehemu ya malisho ya mifugo.

Ruhazi alisema kumekuwa na madai kutoka kwa Wanyarwanda hao kuwa wanataka kuokomboa mkoa wa Kagera ili kuunganisha na nchi yao ya Rwanda.

Aliongeza kuwa taarifa za madai hayo walishazitoa kwa viongozi wa serikali ya Tanzania lakini mpaka sasa hakuna hatua yoyote iliyochukulia dhidi ya kauli hizo.

Naye kwa upande wake diwani wa kata ya Rutoro, Abubakar Bushumbiro, alisema mgogoro wa ardhi umesababisha wanawake kubakwa, wananchi kujeruhiwa na wafugaji.

Bushumbiro alisema wafugaji hao wamekuwa na tabia ya kuwanyanyasa wananchi kwa kuwabaka wakiwa njiani au kuwavamia majumbani mwao.

Alisema kuna wananchi wawili waliokatwa masikio na wafugaji hao ambao ni Modest Kiraja na mwenyekiti wa kitongoji cha Rwamisha aliyemtaja kwa jina moja la Kahatano.

Chanzo: Tanzania Daima

NGARA WAHAMASISHWA KUSHIRIKI SENSA

na Ashura Jumapili, Bukoba

MKUU wa Wilaya ya Ngara, Constantine Kanyasu, amewashauri wananchi wa wilaya hiyo kutoa ushirikiano wakati wa zoezi la Sensa ya Watu na Makazi linalotarajiwa kufanyika Agosti 26 mwaka huu.

Akizungumza na Tanzania Daima jana mjini hapa, Kanyasu, alisema wananchi wana wajibu wa kutoa taarifa zao sahihi, ili kuiwezesha serikali kupanga na kuweka mikakati mbalimbali ya maendeleo kwa kuzingatia idadi ya wakazi waliopo nchini.

Alisema serikali yoyote duniani, haiwezi kuweka mikakati madhubuti ya maendeleo kwa wananchi wake bila kujua idadi kamili ya watu wake na kuongeza kuwa taarifa zote zitakazotolewa zitakuwa ni siri.

Akizungumzia changamoto zilizopo katika wilaya hiyo iliyoko mpakani mwa nchi za Burundi na Rwanda kutokana na mwingiliano wa watu tofauti, alisema wilaya yake imejipanga kikamilifu ili kufanikisha zoezi la sensa.

Alisema Wilaya ya Ngara itahakikisha kila mtu aliyelala katika wilaya hiyo atahesabiwa, ili kukamilisha azima ya serikali katika zoezi hilo.

Chanzo: Tanzania Daima

WALIMU WAFUNDWA JUU YA MIKOPO

na Mbeki Mbeki, Karagwe

WALIMU wilayani Karagwe, Kagera wametakiwa kujenga utamaduni wa kuchukua mikopo inayoendana na uwezo wao kiuchumi na mishahara yao.

Kauli hiyo ilitolewa mjini hapa jana na Katibu wa Chama cha Walimu (CWT) wilayani hapa Velenan Vedasto, alipozungumza na waandishi wa habari juu ya changamoto mbalimbali za kiuchumi zinazowakabili walimu.

Vedasto alisema walimu wanapaswa kuchukua mikopo inayoendana na uwezo wao wa mishahara, ili iweze kuleta tija katika familia zao.

Alisema utafiti uliofanywa na ofisi yake hivi karibuni ulibaini walimu 23 hawana mishahara kabisa na wengine 65 wanapokea mishahara chini ya sh 50,000 kwa mwezi.

“ Kwa kweli hii ni hatari kwa familia za walimu, mwisho wa mwezi hana mshahara…mwalimu wa aina hii hata akaingia darasani kufundisha hata mwanafunzi anamuelewa?” alihoji Vedasto.

Alisema baadhi ya walimu wamekuwa wanakopa mikopo mikubwa katika taasisi za fedha ambayo haiendani na vitega uchumi vyao, matokeo yake kushindwa kurejesha mikopo kwa wakati na wakati mwingine kuziathiri familia zao.

Chanzo: Tanzania Daima

MASHABIKI WAITEGA KAGERA SUGAR

na Ruhazi Ruhazi, Kagera

VIONGOZI wa klabu ya Kagera Sugar inayoshiriki Ligi Kuu ya Soka Tanzania Bara, wanakuna vichwa katika kutekeleza masharti waliyopewa na mashabiki wa soka mkoa wa Kagera.

Akizungumza kutoka kwenye mashamba ya miwa ya Muleba, ambako ndiko makao makuu ya klabu hiyo, meneja na msemaji wa timu hiyo, Mohammed Hussein, alisema kuwa timu hiyo imeanza maandalizi ya msimu mpya wa ligi.

Alisema kuwa mashabiki hao wamewataka kuhakikisha wanawapa nafasi vijana ambao ni wazaliwa wa mkoa huo, iwapo wanataka waendelee kuwaunga mkono, tofauti na hivi sasa ambapo wamekuwa hawapati sapoti ya kutosha kutoka kwa mashabiki hao.

Meneja huyo, alisema kuwa uongozi umekubaliana kuyafanyia kazi mapendekezo ya mashabiki wao kwa kuwapa nafasi ya kwanza wachezaji wazaliwa wa mkoa huo.

“Ndugu yangu tumeanza maandalizi ya msimu mpya wa ligi na pia tunajipanga kukiimarisha kikosi chetu cha vijana kwa kuwa imekuwa ndio kilio cha mashabiki wengi wa soka mkoani Kagera,” alisema Hussein.

Alisema kuwa, wachezaji wao wamesharipoti na kuanza maandalizi ya msimu mpya wa Ligi Kuu chini ya Kocha wao Abdallah Kibaden ‘King Mputa’ na ambaye atasaidiwa na mchezaji wao wa zmaani na kocha msaidizi wa muda mrefu katika kikosi hicho Mrage Kabange.

Chanzo: Tanzania Daima

DC AAMURU MWALIMU ACHUNGUZWE

na Ashura Jumapili, Bukoba

MKUU wa Wilaya ya Ngara, Constantine Kanyasu, amemuagiza Mkurugenzi wa Halmshauri ya Ngara kufanya uchunguzi wa siku 14, ili kubaini tuhuma mbalimbali zinazomkabili Mwalimu Mkuu wa Shule ya Sekondari Kabanga, Enock Ntakisigaye, ikiwemo kutumia majina hewa ya walimu kujipatia fedha pamoja na matumizi mabaya ya fedha na mali za shule.

Akizungumza na Tanzania Daima jana, mkuu huyo wa wilaya (DC), alisema ametoa agizo hilo baada ya kupokea taarifa za kuwepo mgomo baridi wa kufanya kazi kutoka kwa walimu wa shule hiyo kutokana na tuhuma kadhaa ambazo walikuwa wamelalamika kwa muda mrefu bila kufanyiwa kazi.

Alisema kutokana na tuhuma hizo ameamua kumuagiza mkurugenzi kufanya uchunguzi wa kina ili kubaini ukweli wa tuhuma hizo kabla ya hatua zaidi kuchukuliwa.

Aliongeza katika kipindi hicho, mkuu wa shule, Enock Ntakisigaye, makamu wa shule, Daud Michael, na Mhasibu, Kalenzo Majanja, watakuwa nje ya ofisi kupisha uchunguzi.

Chanzo: Tanzania Daima

DC AAMURU MWALIMU ACHUNGUZWE

na Ashura Jumapili, Bukoba

Alisema kutokana na tuhuma hizo ameamua kumuagiza mkurugenzi kufanya uchunguzi wa kina ili kubaini ukweli wa tuhuma hizo kabla ya hatua zaidi kuchukuliwa.

Aliongeza katika kipindi hicho, mkuu wa shule, Enock Ntakisigaye, makamu wa shule, Daud Michael, na Mhasibu, Kalenzo Majanja, watakuwa nje ya ofisi kupisha uchunguzi.

Chanzo: Tanzania Daima

MKOA WA KAGERA WAJIANDAA NA SENSA KWA KUENDESHA MAFUNZO YA WAKUFUNZI

Na Sylvester Raphael

Afisa Habari Mkoa, Kagera

Mkuu wa Mkoa wa Kagera Mheshimiwa Kanali Mstaafu Fabian I. Massawe afungua rasmi mafuzo ya wakufunzi wa sensa mkoani Kagera jana tarehe 17/07/2012 na kuwaasa wajumbe wa mafunzo hayo kuzingatia yote watakayofunzwa ili takwimu sahihi za sensa na makazi ziweze kupatikana kwa ajili ya maendweleo ya mkoa wa Kagera.

Mratibu wa sensa mkoa wa Kagera akimkaribisha Mkuu wa Mkoa katika ufunguzin huo uliofanyika kwenye ukumbi wa Linas Night Club, alisema dhumuni kubwa la mafunzo hayo ni kuwafundisha wajumbe hao kutoka katika wilaya zote za mkoa wa Kagera ili watakapoiva wawe wakufunzi wa makarani wa sensa kuanzia ngazi ya Tarafa.

Mkuu wa Mkoa katika hotuba yake aliwasistiza sana wajumbe wote ambao walitoka katika kila wilaya kuzingatia sana mafunzo hayo kwa kuhakikisha kila kitu watakachofunzwa wanakizingatia kwa umakini mkubwa ili kuwa na uelewa mkubwa wa kwenda kuwafundisha makarani kule kwenye tarafa.

Pia Mkuu wa Mkoa aliwaonya wakufunzi hao kutojihusisha na vitendo vya kubuni au kukadilia takwimu pale watakapokuwa wanakusanya takwimu kwani ni muhimu sana kupata tawimu sahihi zitakazosaidia katika kupanga maendeleo ya taifa zima kwa miaka kumi ijayo. Vile vile alisistiza sana kuwa taarifa zote za sensa ni siri na hakutakuwa na mtu ambaye atatoa taarifa za kaya au za mtu binafsi zitakazoulizwa wakati wa sensa.

Wito; Mkuu wa Mkoa pia alitoa wito kwa wananchi wote kujitokeza kuhesabiwa siku ya kuamkia tarehe 26/07/2012 kwa kila sehemu ya mwananchi atayokuwa amelala. Pia alitoa wito kwa Taasisi za dini, na Taaasisi mbalimbali zote mkoani Kagera kuwahamasisha wananchi juu ya umuhimu wa kujitokeza na kuhesabiwa. Mhe. Massawe alitoa angalizo kuwa serikali haitamvumilia mtu yeyote atakaye jaribu kuvuruga zoezi la sensa, hatua za kisheria zitachukuliwa mara moja.

Mafunzo hayo ya sensa Mkoani Kagera yanaendeshwa na wakufunzi kutoka ngazi ya Kitaifa, aidha mafunzo yanayotolewa ni juu ya kutambua maeneo ya sensa, namna ya kuuliza maswali, namna ya kujaza madodoso pia mafunzo hayo yanafanyika kwa nadharia na vitendo na mwisho wa mafunzo hayo wakufunzi watafanya mtihani wa kujaribiwa kuona kama wameiva.

Kwa hisani ya: www.kajunason.blogspot.com

Fainali za Kumasaka Mrembo wa Kagera Kufanyika Jumamosi tarehe 14.07.2012

Shindano la kumsaka Miss Utalii mkoa wa Kagera 2012, litafanyika katika ukumbi wa Linas Club siku ya tarehe 14-7-2012 kuanzia saa, mbili usiku. Katika shindano hilo Warembo 15 watachuana kuwania taji la miss Utalii Tanzania 2012- Kagera, ambapo watapita jukwaani katika mavazi ya kitanzania ya Ubunifu,kitalii,kutokea na ya asili, huku wakitangaza Utalii, Utamaduni,urembo wa kitalii, ubunifu na vipaji vya kuimba na kucheza nyimbo na ngoma za asili za makabila ya mkoa wa Kagera na Tanzania kwa ujumla. Burudani mbalimbali za Ngoma za asili, bendi na wasanii wa muziki wa kizazi kipya watakuwepo, wakiwemo Diamond Musica Band, Agcox Burchaman toka Uganda,Maua na BK Sunday. Shindano hilo limedhaminiwa na Cargo Star, Vodacom Tanzania,Kroyera Tours,Vission Radio,Kasibante Radio, prins Hotel,Paradise Hotel,Linas Club ,Nice and Lovely Salon,misstourismorganisation.blogspot.com na Amazing Tanzania Tours(Tours and Safaris) .

Washindi wa shindano hilo watawakilisha mkoa wa Kagera katika fainali za miss Utalii Tanzania 2012- Kanda ya Magharibi, na baadae katika fainali za taifa za Miss Utalii Tanzania 2012 zitakazofanyika siku ya mkesha wa uhuru wa Tanzania 8-12-2012.

Miss Tourism Tanzania Symbol Of National Heritage - Do Value Added Pageant

"Lets Visit & Promote Tanzania National Parks -Tourism is Life ,Culture is Lining"

Kizimbani kwa kula mishahara hewa

na Antidius Kalunde, Bukoba

TAASISI ya Kuzuia na Kupambana na Rushwa mkoani Kagera (TAKUKURU) imewafikisha mahakamani watumishi wawili wa ofisi ya Mkuu wa Mkoa Kagera na watumishi sita wa Halmashauri ya Manispaa ya Bukoba kwa tuhuma ya kuchukua na kufuja fedha zinazopitishwa kwa njia ya mishahara hewa.

Akizungumza na waandishi wa habari Kaimu Kamanda wa TAKUKURU mkoani Kagera Samson Bishati alisema watumishi hao wamejihusisha na suala la kupitisha fedha ambazo ni mishahara ya watumishi hewa na kujinufaisha wao wenyewe.

Aliwataja baadhi ya watumishi ambao wamefikishwa katika mahakama ya wilaya ya Bukoba kuwa ni wawili kutoka ofisi ya Mkuu wa Mkoa ambao ni Shaban Kitimbisi na Sifa Musa ambao wote ni wa idara ya fedha.

Watumishi wengine ambao tayari wamefikishwa mahakamani ni kutoka katika Ofisi ya Mkurugenzi wa Manispaa ya Bukoba Idara ya Afya ambao ni David Buhenyenge na Martin Muganyizi.

Alisema watumishi wanne waliobaki bado wanatafutwa na taasisi hiyo na hakuwa tayari kuwataja majina kwakuwa bado wanatafutwa ili kufikishwa mahakamani.

Watumishi ambao wamekamatwa na kufikishwa mahakamani chini ya hakimu wa mahakama hiyo Willibard Mashauri wako nje kwa dhamana hadi kesi itakapotajwa tena ambayo inaendeshwa na mwendesha mashtaka wa TAKUKURU mkoa wa Kagera Fuja Siabo.

Katika hatua nyingine kaimu kamada huyo Bishati ametoa rai kwa umma kutojihusisha kwa namna yoyote katika vitendo vya rushwa kwani TAKUKURU ipo makini na ina uwezo wa kuibua na hatimaye kuwafikisha mahakamani watumishi wa umma ambao sio waadilifu

Chanzo: Tanzania Daima

Njaa yatishia Karagwe

na Mbeki Mbeki

VIJIJI 102 vya Wilaya ya Karagwe mkoani Kagera viko hatarini kukumbwa na njaa kufuatia ugonjwa wa mnyauko kuangamiza zao la ndizi.

Tahadhari hiyo imetolewa jana na mtaalamu wa kilimo wa Wilaya ya Bukoba, Mugenzi Byabachwezi, wakati akitoa mada ya uboreshaji wa hali ya chakula duniani, na kudai kuwa wilaya hiyo na ile mpya ya Kyerwa zitakumbwa na baa hilo.

Alisema kuwa zaidi ya migomba 30,000 tayari imeshambuliwa na migomba 26,000 imefyekwa katika harakati ya kudhibiti ugonjwa hao hatari.

Alisema kuwa ugonjwa huo umeenea kwa kasi zaidi katika vijiji vilivyo mpakani na nchi ya Uganda ambako ugonjwa huo ndiko ulikotokea, kutokana na wafanyabiashara wengi wanaotoka huko na kuingia wilayani humo kwa ajili ya kununua ndizi na mara nyingine mashina ya migomba.

Aliongeza kuwa mbali na kuenea kwa njia ya upepo, matumizi ya mapanga wanayotumia kukatia migomba, hivyo akataka kusitishwa kwa matumizi ya zana hizo kabla ya kuzipitisha kwenye moto.

Mtaalamu huyo alisema namna pekee ya kukabiliana na janga hilo ni kwa wananchi kulima mazao mengine ya chakula kuliko kutegemea misaada kutoka nje

Chanzo: Tanzania Daima

Wajasiriamali wakabidhiwa mkopo wa Sh14 milioni

Phinias Bashaya, Bukoba

MKUU wa Wilaya ya Bukoba, Zipola Pangani, amekabidhi mkopo wa Sh14.5 milioni kwa vikundi vya wanawake, huku akiwataka kuwa wabunifu katika utafutaji masoko.

Akikabidhi mkopo huo mwishoni mwa wiki iliyopita, Pangani alisema hakuna haja ya kuogopa kukopa, kwani hata matajiri hutumia fursa hiyo kama njia ya kujiongezea mitaji.

Pangani aliwataka wanawake na makundi mbalimbali kwenye wilaya hiyo, wasibweteke kusubiri msaada wa Serikali kwani wanaweza kujiwezesha kwa kuanzisha miradi ya ujasiriamali.

Hata hivyo, Pangani alisema mwanzoni vikundi vya wanawake havikuwa na matokeo ya kuridhisha baada ya kupewa mikopo kutokana na kutoandaliwa vizuri.

Pia, aliwataka wasing'ang'anie mradi wa aina moja na kuwa watafute masoko hata kwenye ushindani mkubwa, zikiwamo nchi za Jumuiya ya Afrika Mashariki (EAC) ambako Kagera inapakana na nchi za Uganda, Rwanda na Burundi.

“Msiogope kuchukua mikopo, itumieni kuongeza mtaji wa biashara zenu, mnatakiwa kuwa wabunifu mvuke hata mipaka kuangalia mahitaji ya bidhaa zenu katika masoko mengine,” alisema Pangani.

Awali, Mkurugenzi wa Halmashauri ya Wilaya ya Bukoba, Beatrice Dominick, alisema changamoto inayowakabili ni maombi mengi ya vikundi vinavyohitaji mikopo ikilinganishwa na uwezo mdogo wa halmashauri.

Dominick alisema Wizara ya Maendeleo ya Jamii, Jinsia na Watoto ilitoa Sh8 milioni na zilizosalia zimeongezwa na halmashauri, zinatakiwa kurejeshwe ili baadaye wizara itoe mkopo maradufu.

Naye Ofisa Maendeleo ya Jamii wa Wilaya hiyo, Charles Kiberenge, alisema vikundi 12 vilivyopewa mikopo kwa viwango tofauti vinatoka kata za Kemondo, Kaagya, Nyakato, Kanyangereko, Nyakato, Mikoni na Ibwera.

Alisema halmashauri inaendelea kujengea uwezo makundi mbalimbali na kwamba, kikundi cha Vijana cha Msifuni kinachojihusisha na ufugaji wa samaki kitapewa mkopo hivi karibuni.

Chanzo: Mwananchi

Wananchi wachoma nyumba ya mtendaji

na Ashura Jumapili, Kagera

WANANCHI wa Kijiji cha Nyakabango, Tarafa ya Kimwani, wilaya Muleba, mkoani Kagera wamechoma nyumba ya mtendaji na mwenyekiti wa kijiji hicho na kuharibu mali zenye thamani ya zaidi ya sh milioni baada ya viongozi hao kudaiwa ‘kuchakachua’ mahindi ya misaada yaliyotolewa kwa wananchi hao.

Kamanda wa Polisi mkoani Kagera, Philip Kalangi amethibitisha kutokea kwa tukio hilo lililotokea Juni 20 mwaka huu kati ya saa 2:00 hadi saa 6:00 usiku.

Alisema kabla ya mali hizo kuharibiwa kulikuwa na vurugu za wananchi dhidi ya viongozi wa Kijiji cha Nyakabango ambao ni Ofisa mtendaji wa Kata Nyakabango Ansbert Sabinian(52) na Mwenyekiti wa Kijiji cha Nyakabango Ladislaus Manana (41).

Alieleza chanzo cha ugomvi huo ni msaada wa mahindi tani 61.5 uliopelekwa kwa viongozi hao wa kijiji Mei 28 mwaka huu uliotoka kwa Mkurugenzi wa Halmashauri ya Muleba lengo likiwa ni kugawa kwa wananchi na zoezi hilo lilifanyika.

Alieleza kwamba Juni 19 viongozi waligawa mahindi hayo katika Kitongoji vya Rwenkara na kesho yake waligawa vitongoji vya Nyamagojo na Nyakabango kisha kuwatangazia wananchi kuwa mahindi yamekwisha.

Alieleza kwamba ilipofika majira ya saa 1:00 usiku kulikuwa na minong'ono kuwa mahindi yamechakachulia na viongozi na kuwa ugawaji wa mahindi hayo haukufuata taratibu ndipo walipofanya msako na kukuta mahindi lukuki yakiwa kwa viongozi hao.

Miongoni mwa sehemu walizokuta mahindi hayo ni nyumbani kwa Sabinian (Ofisa Mtendaji wa Kata) ambako walikuta gunia moja na nusu na kwa Tilusubia (magunia mawili), ambapo waliyatoa nje na kuchoma nyumba moto.

Walikuta pia magunia 12 ya mahindi nyumbani kwa Mwenyekiti wa Kijiji, Ladslaus Manana.

Kwa mujibu wa Kamanda Kalangi, uchunguzi wa tuhuma hizo unaendelea na wanawashikilia watuhumiwa wawili ambao ni mtendaji na mwenyekiti.

Chanzo: Tanzania Daima

Bei ya kahawa yashuka Kagera

na Antidius Kalunde, Bukoba

CHAMA Kikuu cha ushirika mkoani Kagera (KCU 1990 LTD) kimeshusha bei ya kahawa kwa kile ilichodai kutokana na kushuka kwa bei hiyo katika soko la dunia.

Mwenyekiti wa chama hicho, John Binunshu, alisema kushuka kwa bei hiyo kunatokana pia na bei ya mnadani kuporomoka kwa siku za hivi karibuni hivyo kulazimu KCU kubadilisha bei ya manunuzi tofauti kama ilivyokuwa awali.

Kutokana na kushuka kwa bei hiyo Binunshu aliwataka wakulima wa kahawa mkoani hapa kutokuwa na wasiwasi kuhusu taarifa hizo kwani wataendelea kupatiwa taarifa za bei kadiri hali ya soko itakavyokuwa.

Katika taarifa ya Meneja mkuu wa KCU, Vedasto Ngaiza, iliyosambazwa kwa mameneja wote wa vyama vya msingi vipatavyo 129 ambavyo vinaendelea na ununuzi wa kahawa kwa msimu huu ambao umefunguliwa rasmi mwezi Mei mwaka huu, bei ya kahawa imeteremka kutoka sh 1,350 hadi sh 1,100 kwa Kahawa aina ya Robusta maganda, huku robusta safi ikiuzwa kwa sh 2,200 kwa kilo.

Kahawa aina ya Arabica maganda imeshuka kutoka sh 1,550 hadi sh 1300 huku safi ikinunuliwa kwa sh 2,600.

Awali mabadiliko ya bei hizo yalionekana kuleta wasiwasi kwa wakulima huku baadhi yao wakihushutumu uongozi wa KCU kuamua kuteremsha bei mara baada ya kubaini kuwepo wingi za kahawa kwa wakulima.

Chanzo: Tanzania Daima

Madiwani wataka mgodi uongeze mrabaha

Na Ali Lityawi, Biharamulo

MADIWANI wa Halmashauri ya Wilaya ya Biharamulo, mkoani Kagera wamemtaka mwekezaji wa mgodi wa dhahabu wa Tulawaka aongeze malipo ya mrabaha kwa madai kuwa sh milioni 300 kwa mwaka zinazotolewa kaziendani na uzalishaji wanaoufanya.

Akizungumza kwenye kikao cha baraza la madiwani, diwani wa Nyabusozi, Musure Bitanabona, alimtaka mwekezaji huyo kuongeza fedha za mrabaha zinazolipwa kwa mwaka kwa halmashauri kwa kuwa fedha hiyo hakiendani na faida kubwa anayoipata.

“Mheshimiwa mwenyekiti siungani mkono malipo ya mrabaha yanayolipwa na mgodi wa Tulawaka…hawa watu wamekuwa wakitupatia kiasi kidogo sana cha fedha ukilinganisha na uzalishaji wanaoufanya, ziara tuliyofanya mgodini imetufumbua mengi, tumeshuhudia kazi zinavyofanyika mgodini hapo.

‘Kwanza mazingira yetu wameyaharibu sana na tuliona mashimo marefu ambayo hata huwezi kufika kwa macho…hii inaonyesha wazi jinsi mwekezaji huyo anavyonufaika na rasilimali zetu huku sisi tukiendelea kutaabika,” alisema Bitanabona.

Hoja hiyo iliungwa mkono na madiwani wengie na kutaka mwekezaji huyo kuongeza fedha za mrabaha na kufuikia sh bilioni moja, ili iwe rahisi kwa halmashauri hiyo kupeleka maendeleo kwa wananchi wake.

Chanzo: Tanzania Daima

Wazee watakiwa kutojihusisha na siasa

na Antidius Kalunde, Bukoba

WAZEE wameshauriwa kutojihusisha na siasa na badala yake watafute mbinu za kukabiliana na hali ngumu ya maisha, ili kuepuka kuwa ombaomba katika maisha yao ya kila siku.

Ushauri huo ulitolewa na Ofisa Maendeleo ya Jamii Manispaa ya Bukoba, Mrisho Issa kwa niaba ya mkurugenzi wa manispaa hiyo wakati wa kufungua tawi la Saidia Jamii ya Wazee Kagera (SAJAWAKA) tawi la Kata ya Kahororo katika manispaa hiyo ambalo limeanzishwa kwa ajili ya kusaidia wazee.

Alisema wazee wanapofungua vikundi kama hicho wanapaswa wajue malengo yake na wala wasijihusishe na siasa, kwani wakati wa kushabikia masuala ya siasa yawe nje ya vikundi hivyo.

Aliongeza kuwa vipo vikundi vingi vinaanzishwa lakini malengo ambayo yamekuwa yamekusudiwa hayafanyiwi kazi na badala yake wanashabikia mambo ya kisiasa.

Katika hatua nyingine, alisema pamoja na kufungua tawi la wazee bado kuna changamoto kwa wazee kutopata huduma ya afya bure hasa wale waliotimiza miaka 60 na kuendelea kama sera ya wizara inavyosema.

Nae Mwenyekiti wa tawi la Saidia jamii ya wazee Kagera tawi la Kata ya Kahororo, Silivandi Muyoza alisema kikundi hicho hakikuanzishwa kwa lengo la siasa na badala yake ni kwa ajili ya kusaidia wazee kimaendeleo kwa kubuni miradi mbalimbali.

Chanzo: Tanzania Daima

Radi yaua sita Kagera

Na Mbeki Mbeki, Bukoba

WATU sita wamefariki dunia kwa kupigwa na radi, watatu wakiwa wa familia moja katika Kata ya Kibingo, Wilaya ya Kyerwa, mkoani Kagera.

Kamanda wa Polisi Mkoa wa Kagera, Phillip Kalangi, aliwataja waliofariki dunia kuwa ni Methodia Kaledunia (35), Bateganya Kamashana (miezi 10) na Kamugisha Kamashara (2).

Wengine waliokufa ni Kazungu Emmanuel (15), mwanafunzi wa darasa sita Shule ya Msingi Kihinda, Dawson Aaron (16) mwanafunzi wa darasa la saba katika Shule ya Msingi Kihinda na Revelian Wilison (4).

Alisema tukio hilo lilitokea Juni 8, majira ya jioni katika Kijiji cha Kihinda, wilayani Kyerwa na kwamba watu hao walikuwa wamejikinga na mvua kwa jirani yao.

Aidha, alisema katika tukio hilo pia mbuzi watano walikufa kwa kupigwa na radi, nyumba moja na baadhi ya mashamba yaliharibiwa vibaya.

Mtendaji wa kijiji hicho, Jofrey Milambwe, alisema watu watatu wa familia moja wamezikwa katika kaburi moja kutokana na mwili yao kuharibika vibaya.

Chanzo: Tanzania Daima

Muleba haina viwanda vya samaki

Na Amana Nyembo, Muleba

LICHA ya Wilaya ya Muleba, mkoani Kagera, kuwa na eneo kubwa la uvuvi, uchunguzi umebaini kuwa haina kiwanda hata kimoja cha kusindika minofu ya samaki.

Uchunguzi uliofanywa na wilayani hapa umebaini kuwa Muleba yenye eneo la mita za mraba 7,225 za maji ya Ziwa Victoria, visiwa 25 pamoja na Ziwa Burigi, wakazi wake kwa kiasi kikubwa wamejikuta wanabakia maskini kutokana na mapato makubwa kwenda nje ya wilaya.

Ofisa Uvuvi wa Wilaya hiyo, Symphorian Ngaiza, aliliambia Tanzania Daima kuwa kutokana na hali hiyo wakazi hao wamekuwa wakikosa ajira kwa vile viwanda vingi viko mkoani Mwanza.

Alisema kikwazo kikubwa kilichozuia wawekezaji kutovutika kuwekeza kwa kujenga viwanda ni miundombinu mibovu ya barabara za kuelekea maeneo ya uvuvi, ukosefu wa umeme, kiwanja cha ndege.

“Mathalani eneo la mwalo wa Kyamkwikwi lilitengwa kama sehemu inayofaa kwa ujenzi wa viwanda vya samaki lakini hakuna umeme, barabara na miundombinu nyingine, hivyo wanunuzi wa samaki wananunua na kupeleka viwandani kwao Mwanza,” alisema Ngaiza.

Hata hivyo, wakati halmashauri ikifikiria zaidi katika upatikanaji wa viwanda vya samaki, kumekuwapo na mgongano wa mawazo baina yake na wananchi wengi wanaodhani ujio wa viwanda hivyo, unatowesha samaki na hivyo kufanya kitoweo hicho kipande bei.

Licha ya wananchi hao kulitazama suala la ajira kama faida moja wapo kwao lakini hatua ya samaki wengi kwenda viwandani hawaliafiki wakati wao wakiendelea kuhangaika kukosa kitoweo.

Aidha, kwa upande wa pili uchunguzi umebaini kuwa wafanyabiashara hao wadogo hawana imani na viwanda kwa sababu huwanyonya katika suala zima la mauzo.

Wakizungumzia suala la samaki kwenda viwandani walisema tangu kuingia biashara ya kimataifa ya samaki wao kama wazawa wilayani Muleba hawanufaiki na ziwa Victoria.

Mmoja wa wananchi hao aliyejitambulisha kwa jina la Al Haji Masoud Abeid alisema uvuvi ulipoingiliwa na serikali kwamba samaki waende viwandani na hatimaye kuuza nje ya nchi wao wanapata shida.

Alisema samaki wanapovuliwa na kwenda viwandani ndio chanzo cha wananchi kukosa kitoweo hicho, hali inayowasababishia kula mboga nyingine tofauti na samaki.

Naye Festol Brason alisema shida ya wenye viwanda ni kwamba samaki anapotoka kuvuliwa wao ndio hupanga bei ya kununua kitu ambacho hakiwanufaishi kwa chochote.

Alisema wao kama wavuvi ndio wanaopaswa kupanga bei kutokana na kukumbana na vikwazo mbalimbali ziwani, lakini hali ilivyo ni tofauti.

Habari hii ni sehemu ya uchunguzi wa chanzo cha hali ya umaskini na maisha duni ya wakazi wa visiwani, mialoni na maeneo karibu na Wilaya ya Muleba na Bukoba. Uchunguzi huu umefadhiliwa na Tanzania Media Fund (TMF).

Chanzo: Tanzania Daima

Jambazi auawa akutwa na silaha kali za kivita, mabomu 3, bunduki 3 AK 47na risasi 246

Na Theonestina Juma, Bukoba

JESHI la polisi Mkoani Kagera limefanikiwa kuua jambazi mmoja na kukutwa na silaha kali za kivita zikiwemo bunduki tatu, risasi 246 mabomu matatu ya kurushwa kwa mkono wakiwa katika harakati za kutaka kuvamia mgodi wa Tulawaka wilani Biharamulo.

Hayo yamebainishwa na Kamanda wa polisi Mkoani Kagera, Philip Kalangi wakati akizungumza na waandishi wa habari ofisini kwake mapema leo asubuhi na kwamba tukio hilo lilitokea Juni 9,m mwaka huu saa 10.30 alafajiri Mavota Tulawaka wilayani humo.

Kamanda Kalangi alisema jambazi huyo aliuawa baada ya polisi kupambana na kundi la majambazi wasiojulikana idadi kwa dakika kadhaa, ambao walizidiwa nguvu na mmoja kuuawa na wengine kukimbilia kusikojulikana.

Alisema baada ya jambazi huyo kuuawa alipopekuliwa alikutwa na silaha hizo, zikiwemo bunduki tatu aina ya AK 47 mbili zikiwa na namba UC 55231990,

UC 16081998 na pamoja na bunduki aina ya Short gun mashine (SMG) yenye namba 56128033262 ambapo mbili zikikuwemo kwenye mfuko wa kiroba ambayo alikuwa akiitumia katika kujihami katika tukio hilo.

Alisema mbali na kukutwa na silaha hizo pia alikutwa na sare pea mbili ambazo zinafanana na za Jeshi la Wananchi Tanzania (JWTZ) buti jozi moja koti ya mvua ambazo zilikuwwa zimefungiwa bunduki mbili na magazine saba zilizokuwa na risasi.

Alisema mwili wa jambo huyo umehifadhiwa katika hospitali Teule ya Wilaya ya Biharamulo ambapo msako unaendelea wa kuwatafuta majambazi wengine waliokimbia kusikojulikana.

Chanzo-Rorya Kwetu Blog